Kreu i Partisë Mundësia, Agron Shehaj, ka reaguar ashpër ndaj performancës së zëvendëskryeministres Belinda Balluku në hapjen e fushatës elektorale të Partisë Socialiste. Duke e cilësuar atë si “maskaradë”, Shehaj ka theksuar kontrastin e fortë mes sjelljes festive të zyrtarëve dhe faktit se, sipas tij, “kanë gjysmën e qeverisë në burg për korrupsion”.
“Çfarë maskarade! Kanë gjysmën e qeverisë në burg për korrupsion se kanë vjedhur qytetarët dhe vetë janë jashtë, jo se janë të ndershëm, por se nuk u ka ardhur radha. Dhe shikoni sesi sillen,” ka shkruar Shehaj në një reagim të tij.
Më tej, ai ka analizuar arsyet pse njerëzit normalisht i përmbahen sjelljes së ndershme, duke përmendur turpin, frikën nga ligji dhe respektin ndaj Zotit. Sipas Shehajt, duket se zyrtarët e lartë të qeverisë nuk ndjejnë asnjë nga këto pengesa.
“Ne kemi frikë nga shteti dhe ligji. Por mesa duket këta mendojnë se shtetin e kanë në xhep dhe nuk i tremben ligjit. Dhe e treta, kemi frikë nga Zoti. Por këta nuk kanë frikë as nga Zoti dhe kjo është arsyeja pse sillen në këtë mënyrë,” ka përfunduar Shehaj, duke shprehur indinjatën e tij për atë që ai e sheh si mungesë turpi dhe përgjegjësie.