Në një takim elektoral në Shkodër, kryetari i Partisë Socialdemokrate, Tom Doshi, ka shprehur kritika të ashpra ndaj qeverisë aktuale dhe opozitës, duke theksuar se partia e tij po sulmohet nga të dyja forcat politike kryesore.
Doshi nuk nguroi të flasë për korrupsionin dhe problemet me drejtësinë, duke deklaruar se “të vjen zor kur sheh gjysmën e qeverisë në burg dhe nën hetim”. Ai gjithashtu kritikoi kryetarin e Bashkisë së Shkodrës, Benet Beci, duke e cilësuar të pandehur dhe të papërshtatshëm për të drejtuar fushatën elektorale.
“I kam 20 vjet me ju, kjo është e gjashta herë që kandidoj në Shkodër. Ju kam shërbyer me sa mundësi kam pasur. Më shumë na kanë sulmuar se na kanë mbështetur. 8 vjet ishte Berisha, 12 vjet Rama, vijnë sot dhe kërkojnë votën,” tha Doshi, duke kujtuar periudhat e qeverisjes së Berishës dhe Ramës.
Ai theksoi se partia e tij nuk mund të mbrojë njerëzit që vjedhin qytetarët dhe se programi i tyre është social, i fokusuar në ndihmën ndaj të varfërve. Doshi gjithashtu pretendoi se ekipi i tij është më i mirë se ai i dy forcave të tjera politike, të cilat i akuzoi për sulme të vazhdueshme.
“Në 2013 Berisha ka lënë pushtetin si i korruptuar edhe sot të vjen zor ku sheh gjysmën e qeverisë në burg dhe nën hetim. Shumëkush thotë pse po e sulmon qeverinë. Ne nuk mund ta marrim në mbrojtje. Njerëzit që vjedhin qytetarët nuk na përkasin ne,” shtoi Doshi.
Deklaratat e Doshit vijnë në një kohë të tensionuar elektorale, duke ngritur pikëpyetje mbi ndikimin e tyre në elektoratin e Shkodrës dhe në politikën kombëtare.