Lulzim Basha, në një intervistë për Euronews Albania, ka shprehur optimizmin e tij për zgjedhjet e 11 majit, duke deklaruar se do të sigurojë një vend në Kuvend përmes koalicionit Euro-Atlantik. Ai theksoi se mbështetja e qytetarëve, e shprehur me refrenin “O Rama, ku i ke shokët?”, është një tregues i fortë i popullaritetit të tij.
Basha tha se nuk ka kryer sondazhe, por planifikon të kontaktojë personalisht 480 mijë mbështetës potencialë, duke përdorur një databazë me numra telefoni të mbledhur gjatë zgjedhjeve të vitit 2021. Ai pretendoi se një test i kryer në 30 mijë numra në Tiranë tregoi se 30% e tyre do të votonin për koalicionin e tij.
Duke u përgjigjur pyetjeve rreth mungesës së ish-aleatëve të tij politikë, Basha tha se ata “lanë veten e tyre” dhe se ai ka “zeruar” figura si Gazment Bardhi dhe Jorida Tabaku. Ai theksoi se lista e tij e kandidatëve përbëhet nga intelektualë, artistë dhe sportistë, të cilët i konsideron “shokët e tij”.
Basha gjithashtu mbrojti përdorimin e videove ironike kundër Edi Ramës, duke thënë se nuk ka frikë nga përballja dhe se qytetarët janë të “tejngopur” me korrupsionin.