Familja Prendi në Lezhë po përballet me një tragjedi të katërt brenda 11 viteve, pas vrasjes së 64-vjeçarit Gjovalin Prendi më 17 prill pranë lokalit të tij. E bija e tij, Viola Prendi, ka bërë një apel të fortë për drejtësi, duke kërkuar kapjen dhe dënimin e autorëve të vrasjes së babait, vëllait dhe kushërinjve të saj.
Viola Prendi ka hedhur poshtë dyshimet e policisë se vrasja e të atit lidhet me të shkuarën e të vëllait, Sidorel Prendi (i njohur edhe si Roan Brahimi), i cili dyshohet për krime të ndryshme. Ajo ka deklaruar se organizatorët e vrasjes së babait dhe vëllait të saj janë Ardian Gjeloshi, i biri Klajd Gjeloshi dhe aleatët e tyre, duke pohuar se i ka denoncuar ata edhe në polici. Konflikti, sipas saj, ka nisur nga një çështje banale për një femër.
E motra e Sidorel Prendit ka mohuar gjithashtu përfshirjen e të vëllait në vrasjen e Brilant Martinajt apo krime të tjera, duke theksuar se ai nuk ka qenë në Shqipëri në atë kohë. Ajo ka pranuar se i vëllai ka pasur njohje me Ervis Martinajn, por ka mohuar kategorikisht që ai të ketë qenë kundërshtar i tij. Sipas saj, një telefonatë e marrë nga Martinaj ka shkaktuar një revoltë të momentit te i vëllai, i cili e ka takuar dhe është kthyer po atë natë pa u dhunuar.
Familja Prendi shprehet e terrorizuar nga ngjarjet, veçanërisht fëmijët, të cilët kanë frikë për sigurinë e tyre. Autoritetet po vijojnë hetimet për zbardhjen e kësaj ngjarjeje të rëndë.