Presidenti Donald Trump ka njoftuar se Shtetet e Bashkuara të Amerikës po zhvillojnë bisedime të drejtpërdrejta me Iranin lidhur me programin e tij bërthamor. Trump zbuloi se dy vendet do të zhvillojnë një takim të rëndësishëm këtë të shtunë për të diskutuar këtë çështje kritike.
Ky njoftim vjen pas bisedimeve të zhvilluara sot në Shtëpinë e Bardhë mes Presidentit Trump dhe Kryeministrit izraelit Benjamin Netanyahu, ku Irani ishte një nga temat kryesore të diskutimit, së bashku me situatën në Rripin e Gazës, marrëdhëniet me Turqinë, praninë siriane dhe tarifat tregtare.
“Ne kemi bisedime të drejtpërdrejta me Iranin – ato kanë filluar dhe do të vazhdojnë të shtunën. Do të kemi një takim madhështor, do të shohim se çfarë mund të bëhet. Mendoj se të gjithë janë dakord se një marrëveshje do të ishte e preferueshme,” u tha Trump gazetarëve, duke nënvizuar preferencën për një zgjidhje diplomatike dhe duke shmangur mundësinë e një konflikti ushtarak.
Trump shprehu optimizmin për mundësinë e arritjes së një marrëveshjeje, duke e cilësuar atë si “vërtet të mrekullueshme”. Ky zhvillim shënon një moment të rëndësishëm duke marrë parasysh se Shtetet e Bashkuara dhe Irani kanë ndërprerë marrëdhëniet diplomatike që nga viti 1979. Bisedimet e drejtpërdrejta sinjalizojnë një përpjekje të re për të gjetur një zgjidhje diplomatike për shqetësimet ndërkombëtare rreth programit bërthamor të Iranit.