Tiranë, Shqipëri – Seanca e fundit në Gjykatën e Posaçme Kundër Korrupsionit dhe Krimit të Organizuar (GJKKO) për dosjen “Plumbi i Artë” u shënua nga debate të ashpra dhe deklarata tronditëse. Ndryshe nga dëshmia e deritanishme e të penduarit Nuredin Dumani, i pandehuri Xhuljan Hoxha akuzoi Erion Alibejn si porositësin e vrasjes së Elton Kilës, i njohur si “Oti i Kilës”. Nga ana tjetër, Alibej paralajmëroi se pas dëshmisë së Dumanit, do të zbardhë krime të tëra që lidhen me Suel Çelën. Një moment kulmor ishte deklarata e Petrit Qolit, i cili shprehu frikën se do të vdesë në qeli dhe paralajmëroi vetëvrasjen.
Në rrëfimet e tij për SPAK, Dumani e kishte faturuar Suel Çelën për tentativën e vrasjes së “Otit”. Por, në seancën e djeshme, Hoxha, i dënuar për vrasjen e Bujar Çelës, vëllait të Talo Çelës, kundërshtoi këtë version. Gjatë një debati të tensionuar me Alibejn, Hoxha deklaroi: “Në një nga takimet që kam zhvilluar me Erjon Alibej, ai më ka folur për vrasjen e Kastriot Kilës. Ai më ka treguar se si e ka porositur vrasjen e Kastriot Kilës. Financues dhe organizator i kësaj ngjarje është Erjon Alibej, jo Suel Çela.”
I pranishëm në seancë, Erion Alibej u shpreh se do të presë fundin e dëshmisë së Nuredin Dumanit për të nisur rrëfimet e tij. Ai u drejtua mediave duke thënë: “Doja të sugjeroja që mediat të bëjnë durim, sepse pasi të mbarojë Nuredin Dumani dëshminë e tij dhe unë do flas për gjithçka. Nga deklarimet e mia, kanë për të dëgjuar mediat për të gjithë Suel Çelat. Unë do i them të gjitha. Janë thënë shumë të pavërteta dhe trillime, sugjeroj mediat mos të nxitohen, derisa të japim dhe ne deklarimet tona.” Hoxha iu përgjigj Alibejt me tone të ashpra: “Unë kam marrë burgim të përjetshëm për fjalët e tua. Kam shumë unë për të thënë për ty.”
Një tjetër moment dramatik ishte deklarata e Petrit Qolit nga banka e të akuzuarve: “Kam frikë se do vdes, kam një gjëndër në trup. Kam 3 vjet në burg, pa parë mbesat e mia. Unë jam marrëzisht i dashuruar me gruan time, nuk e kam takuar. Do vras veten. Jam shumë keq, kam pirë dy qetësues dhe nuk më kanë bërë punë. Po shkelni ligjin me këmbë të gjithë.”
Ndërkohë, Nuredin Dumani vijoi të pyetet nga avokatët, duke folur për njohjen dhe marrëdhënien me Henrik Hoxhajn, të cilin e kishte njohur në 2019 në ditëlindjen e Festim Qolit. Ai tregoi se i kishte ndarë me Hoxhajn detaje rreth disa ngjarjeve kriminale, përfshirë vrasjen e Fatmira Dedës, por shtoi se për shumë ngjarje nuk kishte folur me të për shkak të paqëndrueshmërisë së Hoxhajt.
Seanca e djeshme e “Plumbit të Artë” tregoi një dinamikë të re, me akuza të ndërsjella mes të pandehurve dhe një klimë të tensionuar në sallën e gjyqit. Deklarata e Qolit për vetëvrasje ngre shqetësime serioze për gjendjen e të akuzuarve dhe rrjedhën e mëtejshme të procesit.