Burrel – Operacionet e kërkim-shpëtimit vijojnë me intensitet në Qafën e Burrelit për të gjetur 29-vjeçarin Ardit Beshiri, i cili u zhduk pasi u zu poshtë nga një masiv dheu teksa po punonte me ekskavatorin e tij. Tragjedia ndodhi gjatë çarjes së një rezervuari, duke shkaktuar një vërshim të fuqishëm uji dhe materiali rëre, i cili e mori para të riun.
Kanë kaluar tashmë 48 ditë nga incidenti, por ende nuk ka asnjë gjurmë të Ardit Beshirit. Në momentin kritik të çarjes së rezervuarit, mësohet se 29-vjeçari ndodhej duke punuar në pjesën e poshtme të zonës së rrezikuar. Sasia e madhe e ujit dhe materialit të grumbulluar nga përpunimi i kromit ka bërë që kërkimet të jenë jashtëzakonisht të vështira.
Që prej ditës së shtunë, forca të shumta janë angazhuar në terren për të gjetur të riun. Grupe kërkim-shpëtimi nga Agjencia Kombëtare e Emergjencave Civile (AKSEM), Forcat e Armatosura, Policia e Shtetit, banorë të zonës dhe familjarë të 29-vjeçarit janë në kërkim të vazhdueshëm.
Për shkak të vëllimit të madh të ujit dhe materialit të shembur, deri më tani nuk është gjetur asnjë gjurmë e Ardit Beshirit. E vetmja gjë e identifikuar në zonën e rrëshqitjes së dheut kanë qenë disa pjesë të ekskavatorit me të cilin ai po punonte.
Familjarët e 29-vjeçarit kanë bërë një apel prekës për shtimin e forcave të kërkimit në terrenin malor, duke shpresuar se me më shumë personel dhe pajisje, mund të arrihet në një zbulim. Shpresa për të gjetur Arditin mbetet e gjallë, ndërsa komuniteti lokal dhe forcat e kërkim-shpëtimit vazhdojnë përpjekjet e tyre në kushte të vështira.