Në një mesazh audio të fundit drejtuar qytetarëve nga qelia, Presidenti i Partisë së Lirisë, Ilir Meta, ka ngritur lart thirrjen për mobilizim në prag të zgjedhjeve të 11 Majit. Meta e ka cilësuar këtë datë si një moment historik për Shqipërinë, duke theksuar se ajo do të shënojë fitoren e lirisë mbi atë që ai e quan tirani.
“Besoj që të gjithë ju që më dëgjoni, keni shumë më tepër mundësi se sa unë që të lëvizni, që të takoni dhe që të luftoni në këto 6 javë në mënyrë që 11 Maji të jetë dita historike e triumfit të lirisë mbi tiraninë”, ka deklaruar Meta në mesazhin e tij.
Kreu i PL ka shfrytëzuar audioporosin për të kritikuar ashpër qeverinë e udhëhequr nga Edi Rama. Ai ka argumentuar se pas 12 vitesh në pushtet, kryeministri ka dështuar në përmbushjen e premtimeve të tij dhe ka keqpërdorur burimet financiare të vendit për projekte që, sipas Metës, nuk kanë sjellë zhvillim të vërtetë.
“Edi Rama, duke ju fshehur llogaridhënies, pas 12 vitesh, për të gjitha ato mundësi që i kishte në dorë, premton sot, çuditërisht, ato që si ka në dorë”, ka theksuar Meta, duke nënvizuar mungesën e përgjegjshmërisë nga ana e qeverisë.
Më tej, Meta ka prezantuar programin e opozitës si një alternativë të qartë, realiste dhe në interes të shumicës dërrmuese të shqiptarëve. Ai ka bërë thirrje për mbështetjen e opozitës si garanci për fuqizimin e ekonomisë familjare dhe kombëtare, si dhe përshpejtimin e integrimit europian.
Në mesazhin e tij, Meta ka listuar një sërë dështimesh të qeverisë, duke përmendur çështje të tilla si furnizimi me ujë të pijshëm, legalizimet, shëndetësia, arsimi, korrupsioni dhe niveli i ulët i mbledhjes së të ardhurave në krahasim me vendet e tjera të rajonit. Ai ka akuzuar Ramën për vjedhje të taksave të qytetarëve përmes projekteve të dështuara dhe për mungesë transparence dhe llogaridhënie.
Meta ka theksuar se opozita, e përfaqësuar nga Partia Demokratike dhe aleatët e saj, është e gatshme të ofrojë një vizion të ri për Shqipërinë, duke u fokusuar në interesat e qytetarëve dhe integrimin e vendit në Bashkimin Europian. Ai ka kujtuar lidhjet e forta të Partisë Demokratike me Partitë Popullore Europiane, duke e parë këtë si një avantazh për procesin e integrimit.
Në fund të mesazhit të tij, Ilir Meta u ka kërkuar mbështetësve të tij dhe të gjithë qytetarëve të angazhohen maksimalisht në këto javë të mbetura deri në 11 Maj, duke theksuar rëndësinë e çdo vote për të arritur fitoren e lirisë dhe për të ndryshuar fatin e Shqipërisë. Ai ka përfunduar duke inkurajuar qytetarët të votojnë për numrin 1 në fletën e votimit, simbolin e koalicionit PD-ASHM.