Një grabitje e guximshme ka tronditur Francën, ku kriminelë të panjohur kanë sulmuar një furgon të blinduar në Verdun-sur-Garonne, pranë Toulouse, duke marrë me vete rreth 3 milionë euro në lingota dhe monedha ari. Furgoni mbante gjithsej mbi 6 milionë euro, përfshirë edhe vepra arti me vlerë të konsiderueshme.
Pas kryerjes së grabitjes, autorët dogjën furgonin në përpjekje për të fshirë çdo gjurmë. Megjithatë, një dëshmitare e rastësishme, e cila vuri re lëvizjen e dyshimtë të mjetit, e ndoqi atë dhe filmoi itinerarin me telefonin e saj. Kjo video e dorëzuar në polici ka ndihmuar tashmë hetuesit në përcaktimin e rrugës së përdorur nga grabitësit.
Çuditërisht, kriminelët duket se kishin njohuri specifike për ngarkesën, pasi shkarkuan vetëm pjesën me ar, duke lënë pas veprat e artit me vlerë mbi 3.5 milionë euro. Madje, ata zgjodhën t’i digjnin edhe ato së bashku me furgonin.
Policia franceze po heton intensivisht mbi këtë ngjarje, duke dyshuar se grabitësit mund të kenë pasur informacion të brendshëm për transportin dhe mungesën e mbikëqyrjes. Gendarmeria e Toulouse dhe ekspertë kriminalistikë po punojnë për të identifikuar autorët dhe bashkëpunëtorët e mundshëm, si dhe po intervistojnë dëshmitaren kyçe.