Një sërë incidentesh të fundit kanë ngjallur shqetësim të madh mes prindërve dhe mësuesve në Vjenë, veçanërisht në lagjen Donaustadt. Një tentativë e fundit për rrëmbim fëmije u raportua pranë shkollës fillore Oberdorfstraße, duke shtuar frikën pas rasteve të ngjashme në zona të tjera të qytetit.
Sipas raportimeve të ORF, një djalë tetë vjeçar u afrua nga një burrë i panjohur, i cili dyshohet se e kapi për krahu dhe i tha: “Ti po vjen me mua tani”. Fatmirësisht, fëmija arriti t’i shpëtojë burrit dhe tani policia po vijon hetimet për këtë incident shqetësues, siç raporton albinfo.at.
Ky rast vjen pas një tjetër tentative rrëmbimi pranë shkollës fillore Wulzendorfstraße dhe tre incidenteve të tjera të raportuara në Neubau që nga muaji shkurt. Kjo seri ngjarjesh ka detyruar shkollat të marrin masa paraprake, duke paralajmëruar prindërit dhe duke inkurajuar fëmijët të udhëtojnë në grupe për të rritur sigurinë e tyre.
Ndërkohë, policia e Vjenës ka lëshuar rekomandime për prindërit, duke theksuar rëndësinë e mësimit të fëmijëve se si të vendosin kufijtë e tyre dhe si të kërkojnë ndihmë në situata që mund të jenë të rrezikshme. Autoritetet po punojnë për të zbardhur këto incidente dhe për të siguruar qetësinë e komunitetit.