Hongping Xiao, drejtori i përgjithshëm i “Bankers Petroleum Albania Ltd”, dhe ish-drejtori Leonidha Çobo u arrestuan dje në kuadër të një hetimi të Prokurorisë së Fierit. Ata dyshohen për shmangie tatimore dhe vepra të tjera penale që datojnë që nga viti 2004.
Megjithatë, gazetarja Ola Xama, e ftuar në MCN TV, ngriti dyshime të forta se kjo çështje mund të ketë prapaskena politike ose ekonomike, duke sugjeruar një “luftë territoresh” për kontrollin mbi kompaninë.
Xama theksoi se kontrata me “Bankers Petroleum” është lidhur që në vitin 2004 dhe ka kaluar në heshtje nëpër disa qeveri, duke filluar nga ajo e Fatos Nanos, dy mandate të PD-së, dhe tre mandate të PS-së. “Tani, papritur, pas 20 vitesh, arrestohet CEO i një prej kompanive më të mëdha kineze që operojnë në Shqipëri. Nuk mund të mos lindin dyshime për motive të tjera,” u shpreh ajo.
Sipas Xamës, përplasjet rreth kontratës dhe raportimet për shkelje nuk janë të reja, por vetëm tani organet e drejtësisë po veprojnë. Ajo shtoi se pas kalimit të kompanisë në pronësi kineze, janë bërë kallëzime dhe janë dërguar letra të hapura në ambasada kundër Leonidha Çobo, por hetimet nuk kanë nisur menjëherë.
“Gjithë kjo situatë të bën të mendosh se ndoshta kemi të bëjmë me një prapaskenë dhe një luftë për të marrë dikush tjetër pronësinë e ‘Bankers Petroleum’. Mund të jetë shumë më tepër sesa thjesht shmangie tatimore,” përfundoi Xama.
Hetimet po zhvillohen nga Prokuroria e Fierit në bashkëpunim me Policinë e Krimit Ekonomik dhe Drejtorinë e Tatimeve.