Drejtuesi i fushatës së Partisë Demokratike (PD), Chris LaCivita, në emisionin “Opinion”, diskutoi ngjashmëritë mes situatës politike në Shtetet e Bashkuara dhe Shqipëri. Ai theksoi se çështjet kryesore si rritja e çmimeve, kostoja e lartë e jetesës dhe punësimi janë shqetësime të përbashkëta. LaCivita vuri në dukje se këto ishin faktorë që ndikuan në fitoren e Donald Trump në SHBA dhe sheh paralele me sfidat me të cilat është përballur Sali Berisha.
I pyetur nga Blendi Fevziu për detajet financiare të kontratës së tij me PD-në, LaCivita nuk dha një shifër konkrete. Ai u përgjigj me një pyetje retorike ndaj Fevziut në lidhje me të ardhurat e tij dhe shpjegoi se detajet e kontratës janë miratuar nga avokatët e të dyja palëve dhe do të bëhen publike në një moment të dytë, sipas një agjende të caktuar. LaCivita e kuptoi interesin për këtë pyetje, veçanërisht nga ana e Edi Ramës.