Bashkimi Evropian ka gjobitur platformën e mediave sociale Tik-Tok me një shumë të madhe prej 530 milionë eurosh për shkelje të ligjeve evropiane për mbrojtjen e të dhënave. Lajmi u bë publik nga Komisioni Irlandez për Mbrojtjen e të Dhënave (DPC), i cili theksoi se gjoba lidhet drejtpërdrejt me transferimin e të dhënave personale të përdoruesve evropianë nga ana e kompanisë në Kinë.
Vendimi i DPC-së detyron Tik-Tok-un të paguajë gjobën prej qindra milionë eurosh dhe gjithashtu të përshtatë mënyrën e përpunimit të të dhënave brenda një afati prej gjashtë muajsh, në mënyrë që të jetë në përputhje të plotë me rregulloret e BE-së për mbrojtjen e të dhënave personale.
Hetimi i autoriteteve evropiane zbuloi se Tik-Tok kishte transferuar në mënyrë sekrete të dhëna personale të përdoruesve nga Evropa në servera të vendosur në Kinë. Fillimisht, gjatë procesit hetimor, kompania kishte deklaruar publikisht se nuk ruante të dhëna të përdoruesve evropianë në servera kinezë. Megjithatë, në muajin prill, Tik-Tok pranoi se një transferim i tillë kishte ndodhur në një masë të kufizuar.
Kjo gjobë e rëndë vjen si një sinjal i qartë nga BE se platformat e mediave sociale duhet të jenë transparente dhe të respektojnë rigorozisht ligjet e mbrojtjes së të dhënave të qytetarëve evropianë. Transferimi i fshehtë i të dhënave në vende me regjime të ndryshme ligjore ngre shqetësime serioze për privatësinë dhe sigurinë e informacionit të përdoruesve. Vendimi pritet të ketë ndikim të konsiderueshëm në operacionet e Tik-Tok-ut në Evropë dhe mund të shërbejë si precedent për platforma të tjera të mediave sociale.