Në raportin e fundit të Bankës Botërore për rajonin, Shqipëria përballet me një perspektivë të gjatë për t’u bashkuar me grupin e vendeve me të ardhura të larta. Sipas projeksioneve, vendit do t’i duhen të paktën dy dekada për të kaluar pragun e 14 mijë dollarëve të ardhura për frymë në vit, nga rreth 8,500 dollarë që ishin në vitin 2023.
Raporti, i cili përfshin 11 vende nga Azia Qendrore deri në Europën Lindore, e rendit Shqipërinë aktualisht në kategorinë e vendeve me të ardhura mesatare të larta (midis 4,500 dhe 14,000 dollarë për frymë në vit). Për të hyrë në grupin e vendeve të pasura, Shqipëria duhet të tejkalojë këtë nivel të ardhurash.
Megjithatë, sfida duket edhe më e madhe kur flasim për cilësinë e jetesës. Sipas Bankës Europiane për Rindërtim dhe Zhvillim (BERZH), Shqipërisë mund t’i duhen mbi 50 vite për të arritur standardet e jetesës që gëzojnë aktualisht vendet e Bashkimit Europian. Kjo e vendos Shqipërinë prapa vendeve të tjera të Ballkanit Perëndimor si Serbia, Mali i Zi dhe Bosnja e Hercegovina, të cilat pritet ta arrijnë këtë objektiv brenda 10 deri në 18 viteve.
Banka Botërore thekson se vendet e Ballkanit, përfshirë Shqipërinë, përballen me pengesa të konsiderueshme në përpjekjen për të ngushtuar hendekun ekonomik me vendet më të zhvilluara. Vështirësitë në sistemin ekonomik, pasojat e pandemisë globale dhe një ritëm zhvillimi më i ngadaltë se potenciali i vendit, janë përmendur si faktorë kryesorë që pengojnë Shqipërinë dhe rajonin të përparojnë më shpejt drejt mirëqenies dhe zhvillimit të qëndrueshëm. Raporti nënvizon nevojën për reforma të thella dhe politika efektive për të përshpejtuar rritjen ekonomike dhe përmirësuar cilësinë e jetesës në Shqipëri.