Pas atentatit të 17 prillit në Lundër të Tiranës, ku u plagosën katër persona, përfshirë dy djemtë e pronarit të “Pelikani Security”, policia ka gjetur një motomjet të djegur në zonën e Mulletit. Ky mjet dyshohet të jetë përdorur nga autorët e sulmit.
Grupi hetimor po vijon punën për të zbardhur rrethanat dhe për të identifikuar autorët. Viktimat e plagosura ishin Dior Demiraj (11 vjeç), Marko Bardhi Demiraj (17 vjeç), Kian Mullaj (19 vjeç) dhe shoferi Arens Stafa (34 vjeç). Dy djemtë e pronarit u transportuan jashtë vendit për trajtim të specializuar.
Policia po heton pistën e një ngatërrimi të mundshëm të shënjestrës. Kjo pasi, në të njëjtën natë, në Pllanë të Lezhës u ekzekutua Gjovalin Prendi, babai i Roan Brahimit. Vetë Roan Brahimi u vra në Athinë në maj të vitit 2024. Dyshohet se objektiv i atentatit në Tiranë mund të ketë qenë gruaja e parë e Roan Brahimit, e cila është motra e Ilir Beqarajt, të arrestuar për vrasjen e Gentjan Bejtjas. Automjeti tip “G Class” që përdornin të plagosurit mund të jetë ngatërruar me makinën e gruas së Roan Brahimit.
Edhe mjeti i përdorur në vrasjen e Gjovalin Prendit u gjet i djegur në Fushë Gjormë, duke vështirësuar zbulimin e gjurmëve. Hetimet për të dyja ngjarjet vijojnë intensivisht.