Një tjetër skandal ushqimor trondit Shqipërinë, kësaj here duke prekur produktin e përditshëm të qumështit. Pas rasteve të fundit të mishit të pulës me salmonelë dhe luleshtrydheve me pesticide, Agjencia Kombëtare e Ushqimit (AKU) ka konfirmuar se në Vlorë është tregtuar qumësht i ndotur me aflatoksinë M1, një toksinë kancerogjene tepër e rrezikshme për shëndetin.
Sipas raportimeve të “A2 CNN”, analizat e mostrave të qumështit të marra në qytetin bregdetar kanë zbuluar praninë e kësaj substance toksike. Nga 26 mostra të analizuara gjatë periudhës janar-prill 2025, 10 prej tyre kanë rezultuar pozitive. Specialistët alarmojnë se gati 40% e qumështit të kontrolluar në Vlorë ishte i kontaminuar mbi normat e lejuara të sigurisë ushqimore.
Mostrat pozitive janë gjetur në markete dhe supermarkete të ndryshme të qytetit. Analizat e kryera në ISUV kanë konfirmuar praninë e aflatoksinës M1 në kampionet e qumështit. Kjo toksinë, e pranishme në qumësht si pasojë e ushqimit të kontaminuar të lopëve, klasifikohet si kancerogjene dhe gjenotoksike, duke paraqitur një rrezik veçanërisht të lartë për fëmijët dhe konsumatorët e rregullt.
Çfarë është aflatoksina?
Aflatoksina është një toksinë e prodhuar nga myku që rritet në drithëra, misër dhe grurë. Kur kafshët, si lopët, ushqehen me foragjere të kontaminuara, aflatoksina mund të sekretohet në qumështin e tyre. Konsumimi i qumështit të kontaminuar me aflatoksinë ka pasoja serioze për shëndetin e njeriut. Organizata Botërore e Shëndetësisë (OBSH) e klasifikon aflatoksinën si kancerogjene të grupit 1, duke rritur rrezikun për probleme në mëlçi dhe veshka.
Ky skandal i radhës ngre pikëpyetje serioze mbi kontrollet e sigurisë ushqimore në Shqipëri dhe rrezikun që i kanoset shëndetit të qytetarëve nga produktet ushqimore të kontaminuara.