Siguria ushqimore në Shqipëri po tronditet nga një seri skandalesh që nga dhjetori, duke ngritur alarmin për shëndetin e konsumatorëve. Pas mandarinave të kthyera nga Kroacia dhe salmonelës në mishin e pulës nga Brazili, skandali i fundit përfshin luleshtrydhe të importuara nga Greqia, të cilat rezultuan të ngarkuara me pesticide të rrezikshme.
Ekspertja e sigurisë ushqimore ka theksuar se përgjegjësia kryesore për këtë situatë qëndron në mungesën e kontrollit efektiv, mungesën e ekspertëve të specializuar dhe korrupsionin brenda institucioneve përgjegjëse si Agjencia Kombëtare e Ushqimit (AKU). Ajo kritikoi faktin që pozicione kyçe në AKU mbahen nga persona joadekuatë, duke përmendur mungesën e agronomëve në kontrollin e pesticideve.
Vuksani paralajmëroi se pesticidet paraqesin një rrezik shumë më të madh se salmonela, pasi efektet e tyre janë afatgjata dhe shpesh të padukshme në momentin e konsumimit, duke shkaktuar probleme serioze si deformime të fetusit, mutacione gjenetike dhe sëmundje kancerogjene. “Jemi kthyer në një magazinë ku çdo gjë që nuk të bën mirë futet në organizmin tonë,” u shpreh ajo.
Duke iu referuar rastit të luleshtrydheve, ekspertja ngriti shqetësimin për vonesën dhe fragmentarizimin e informacionit për publikun. Ajo theksoi se informacioni për ngarkesat e kontaminuara jepet me vonesë prej dy muajsh dhe mungon transparenca për sasinë e ngarkesave të tjera të dyshimta.
Ajo zbuloi se pesticidet e gjetura në luleshtrydhe janë të ndaluara në Bashkimin Evropian për shkak të rrezikshmërisë së tyre të lartë dhe tejkalojnë normat e lejuara.
Në përfundim, ekspertja kërkoi ngritjen e një Task Force të posaçme për të hetuar dhe monitoruar këto raste, si dhe rritjen e transparencës nga institucionet përgjegjëse për të rifituar besimin e publikut. Ajo theksoi se mungesa e informacionit dhe vonesa në njoftime ekspozojnë konsumatorët ndaj rrezikut të ushqimit të kontaminuar.