Shqipëria po shënon një rritje të vazhdueshme në sektorin e turizmit, duke thyer rekorde vizitorësh nga viti në vit. Pas një viti të suksesshëm, ku vendi ynë u vizitua nga një numër i madh turistësh të tërhequr nga bukuritë natyrore, pritshmëritë për këtë sezon janë edhe më të larta. Vlerësimet pozitive të vizitorëve e kanë ngritur emrin e Shqipërisë si një destinacion gjithnjë e më tërheqës në hartën turistike botërore.
Eksperti i turizmit, Rigers Beqiri, parashikon një rritje të ndjeshme të numrit të turistëve për këtë vit. “Turistët do të vazhdojnë të marrin një eksperiencë të personalizuar dhe unike, ashtu siç di shqiptari ta japë për mysafirët. Shqipëria vitin e kaluar pati rreth 11 milionë vizitorë, ndërsa këtë vit presim që të kemi rreth 13 milionë. Për Shqipërinë kjo është një shifër e madhe, por vendi ynë ka çfarë të ofrojë në të gjithë territorin e tij,” thekson ai.
Shqipëria ofron një larmi destinacionesh që i përshtaten preferencave të ndryshme të turistëve. Nga Alpet e mrekullueshme me Thethin dhe Valbonën, ideale për adhuruesit e natyrës dhe hiking-ut, tek qytetet me histori dhe kulturë si Tirana, Kruja dhe Berati. Pa harruar bregdetin mahnitës me plazhet e tij të jashtëzakonshme, Shqipëria ka diçka për të gjithë.
Megjithatë, ky fluks i madh vizitorësh sjell me vete edhe sfida të rëndësishme për industrinë e turizmit shqiptar. Sipas ekspertëve, një nga sfidat kryesore është përmirësimi i cilësisë dhe standardizimi i shërbimeve. “Mendoj se sfida kryesore për këtë vit është cilësia dhe standardizimi. Kur një turist drejtohet drejt një biznesi të tillë, duhet të dijë çfarë shërbimi merr – pra, të jetë i qartë target-grupi me të cilin bizneset operojnë. Sepse na ka ndodhur që një biznes ofron një shërbim, le të themi me 5 yje, por faktikisht ai është në nivelin e tre yjeve,” shpjegon Beqiri.
Një tjetër sfidë e rëndësishme është fuqia punëtore, një problem që prek jo vetëm Shqipërinë, por të gjithë kontinentin europian. Megjithatë, Shqipëria duket se po e adreson këtë çështje duke rekrutuar punëtorë nga vende të tjera.
Për të shfrytëzuar potencialin e plotë të turizmit dhe për të siguruar një eksperiencë pozitive për vizitorët, është thelbësore që Shqipëria të fokusohet në rritjen e standardeve të shërbimit, duke ofruar kështu një vlerë të shtuar për turistët dhe duke e pozicionuar vendin si një destinacion cilësor në tregun ndërkombëtar.