Durrës, Shqipëri – Një hap i rëndësishëm për industrinë ushtarake navale shqiptare u hodh sot në Portin e Durrësit me nënshkrimin e marrëveshjes mes kompanisë italiane të ndërtimit të anijeve Fincantieri dhe shoqërisë shqiptare “KAYO”. Ky bashkëpunim synon prodhimin e anijeve, fillimisht për të plotësuar nevojat e Forcës Detare Shqiptare, me synimin për eksport në të ardhmen.
Në ceremoninë e nënshkrimit ishte i pranishëm edhe Kryeministri Edi Rama, i cili e vlerësoi këtë marrëveshje si një thellim të mëtejshëm të miqësisë dhe marrëdhënieve mes Shqipërisë dhe Italisë. Rama theksoi se kjo nismë tejkalon aspektin thjesht material, duke forcuar lidhjet mes dy vendeve fqinje.
“Dua t’i siguroj të gjithë që kjo është më shumë se aspekti material, sepse po punojmë për të krijuar një sinergji të rëndësishme dhe për të krijuar bashkë një energji të re, për të ecur përpara dhe për të transformuar dhe thelluar edhe më shumë këtë miqësi dhe marrëdhënie mes dy shteteve,” u shpreh Kryeministri Rama. Ai shprehu gjithashtu falënderimet për skuadrën e përfshirë dhe për kreun e Ushtrisë italiane.
Fincantieri, me seli në Trieste, është një nga kompanitë më të mëdha të ndërtimit të anijeve në botë, duke prodhuar anije tregtare dhe ushtarake. Ky partneritet pritet të sjellë zhvillim dhe ekspertizë të re në sektorin detar ushtarak të Shqipërisë.