Departamenti amerikan i Shtetit (DASH) ka njoftuar Kongresin amerikan për planet ambicioze për të riorganizuar Agjencinë e Shteteve të Bashkuara për Zhvillim Ndërkombëtar (USAID), duke synuar ndërprerjen e funksioneve që konsiderohen si jo në përputhje me prioritetet e administratës aktuale. Lajmi u konfirmua të premten nga Sekretari amerikan i Shtetit, Marco Rubio, i cili e lidhi këtë lëvizje me trashëgiminë e ish-Presidentit Donald Trump.
Në një komunikatë zyrtare, Rubio shprehet se USAID-i “i është larguar misionit që një kohë, dhe si rezultat, përfitimet kanë qenë shumë të vogla dhe shpenzimet kanë qenë shumë të larta”. Ai më tej thekson se “Falë presidentit Trump, kjo epokë e papërgjegjshmërisë fiskale ka përfunduar. Ne jemi duke riorientuar programet tona për ndihmë të huaj për të qenë në linjë me atë që është më e mira për Shtetet e Bashkuara dhe shtetasit tanë”.
Sipas njoftimit, DASH dhe USAID kanë informuar Kongresin për synimin e tyre “për të nisur një riorganizim të disa funksioneve të USAID-it me Departamentin e Shtetit prej 1 korrikut, dhe për t’i pushuar funksionet ekzistuese të USAID-it që nuk janë në përputhje me prioritetet e administratës”.
Kjo lëvizje vjen pak pas fillimit të mandatit të dytë të Presidentit Trump në Shtëpinë e Bardhë, më 20 janar. Departamenti për Efiçencë Qeveritare (DOGE), nën drejtimin e miliarderit Elon Musk, ka nisur një proces të zvogëlimit të USAID-it, duke integruar pjesën e mbetur të agjencisë brenda Departamentit të Shtetit.
Që nga ajo kohë, administrata amerikane ka ndërmarrë veprime drastike, duke përfshirë largimin nga puna të qindra punonjësve dhe kontraktorëve, si dhe ndërprerjen e kontratave për projekte me vlerë miliarda dollarë, nga të cilat varen jetët dhe mirëqenia e dhjetëra miliona njerëzve në mbarë botën.
Sekretari Rubio kishte deklaruar më herët gjatë muajit se mbi 80 për qind e të gjitha programeve të USAID-it tashmë janë pezulluar.
USAID-i, dikur agjencia kryesore e Qeverisë amerikane për administrimin e ndihmave të huaja civile dhe ndihmave për zhvillim, operonte në më shumë se 100 vende, duke shpërndarë çdo vit ndihma në vlerë të konsiderueshme. Prania e USAID-it në Kosovë daton që nga viti 1999, dhe që atëherë agjencia ka investuar mbi 1 miliard dollarë në zhvillimin e vendit.
Riorganizimi i USAID-it dhe integrimi i tij pjesërisht në Departamentin e Shtetit shënjojnë një ndryshim të rëndësishëm në qasjen e Shteteve të Bashkuara ndaj ndihmës së huaj dhe zhvillimit ndërkombëtar, duke ngritur pikëpyetje mbi impaktin e kësaj politike në të ardhmen e programeve të ndihmës amerikane në mbarë botën, përfshirë edhe Kosovën.