Tiranë, Shqipëri – Një raport i fundit vjetor i Strukturës së Posaçme Kundër Korrupsionit dhe Krimit të Organizuar (SPAK) ka zbuluar detaje shqetësuese mbi operacionet e grupeve kriminale në Shqipëri, duke identifikuar 16 grupe me rrezikshmëri të lartë që “bëjnë ligjin” në vend. Raporti, i siguruar nga “Pamfleti” dhe tashmë i dërguar në Kuvend, ofron një panoramë të detajuar të krimit të organizuar, korrupsionit, pastrimit të parave dhe mënyrave të trafikimit të drogës në vitin 2024.
Sipas gjetjeve të SPAK, 16 grupe kriminale shumë të rrezikshme operojnë në qytete të ndryshme të Shqipërisë, duke përfshirë Tiranën, Durrësin, Shkodrën, Kukësin, Lezhën, Elbasanin dhe Vlorën. Raporti thekson se këto grupe mbështeten kryesisht në lidhje familjare dhe miqësore dhe janë fuqimisht të përfshira në tregjet ndërkombëtare kriminale, me fokus të veçantë trafikun e kokainës.
SPAK ka arritur të provojë me sukses aktivitetin kriminal të 10 prej këtyre grupeve në qytete si Tiranë (3), Durrës (2), Elbasan (2), Shkodër (1), Lezhë (1) dhe Kukës (1). Një ndihmë e madhe në këtë drejtim ka qenë zbërthimi i aplikacionit të komunikimeve të koduara “SKY ECC”.
Raporti detajon se grupet kriminale shqiptare vijojnë të jenë aktive kryesisht në trafikun e kokainës dhe kanabisit, duke operuar në disa shtete të Bashkimit Evropian (BE) si Italia, Spanja, Belgjika, Holanda, Franca, Gjermania, si dhe në vende të tjera si Norvegjia, Zvicra dhe Mbretëria e Bashkuar (MB). Këto gjetje konfirmohen edhe nga raporti i Europol-it për vitin 2024.
Një zhvillim shqetësues i theksuar në raport është aftësia e grupeve kriminale shqiptare për të siguruar blerjen e kokainës direkt në vendet e prodhimit në Amerikën Latine si Bolivi, Meksikë, Peru, Ekuador dhe Paraguai. Shtetas shqiptarë, anëtarë të këtyre grupeve, me banim në Brazil, Paraguai, Ekuador dhe Surinam, shpesh në role drejtuese ose koordinuese, ndjekin të gjithë procesin e transferimit të ngarkesës nga origjina deri në destinacion.
Dërgesat e drogës kalojnë drejt BE-së dhe Ballkanit Perëndimor kryesisht nëpër portet hyrëse të Gioia Tauro (Itali), Roterdam (Holandë), Antëerp (Belgjikë), Algeciras (Spanjë), Pire (Greqi), si dhe nëpërmjet porteve të Durrësit (Shqipëri) dhe Tivarit (Mal i Zi). Shumë prej eksponentëve kryesorë të këtyre grupeve janë vendosur në Dubai të Emirateve të Bashkuara Arabe.
Veçori dalluese të këtyre grupeve kriminale me rrezikshmëri të lartë janë struktura e tyre hierarkike, ndarja e roleve dhe përfshirja në anëtarësinë e tyre të individëve që vijnë nga gjyqësori, prokuroria, policia e shtetit, media dhe bota akademike. Përdorimi i komunikimeve të koduara si SKY ECC dhe pastrimi i parave nëpërmjet kriptovalutave janë gjithashtu tipare të këtyre grupeve.
Megjithëse në një shkallë më të ulët, grupet kriminale shqiptare janë gjithashtu të përfshira në kontrabandën e qenieve njerëzore dhe krimin kibernetik, duke operuar në tregjet ndërkombëtare të BE-së, Mbretërisë së Bashkuar dhe Shteteve të Bashkuara të Amerikës (SHBA). Raporti i SPAK nxjerr në pah sfidën e madhe me të cilën përballet vendi në luftën kundër krimit të organizuar dhe nevojën për një angazhim të shtuar dhe bashkëpunim ndërinstitucional për të goditur këto struktura të rrezikshme.