Kryeministri Edi Rama ka nisur takimin me emigrantët shqiptarë në Milano, duke e cilësuar datën 11 maj si një moment historik dhe përcaktues për të ardhmen europiane të Shqipërisë. Në fjalën e tij në Centro Congressi, Rama theksoi se këto zgjedhje janë një udhëkryq dhe shqiptarët nuk mund të lejojnë të humbasin këtë shans as për “mustaqet e Kujtim Gjuzit” e as për “bufin që fshihet nën mustaqet e tij,” duke iu referuar në mënyrë figurative kundërshtarëve politikë.
Një theks i veçantë i fjalës së Ramës ishte mundësia historike që u ofrohet shqiptarëve kudo që ndodhen për të marrë pjesë në votime pa qenë nevoja të udhëtojnë drejt Shqipërisë. “Është hera e parë në historinë e zgjedhjeve që dhe ju dhe të gjithë shqiptarët jashtë kufijve do të kenë mundësi të zgjedhin pa patur nevojë të vinë në Shqipëri,” deklaroi Rama.
Ai shprehu kënaqësinë që premtimi i dhënë në fillim të mandatit është bërë realitet, duke e bërë të mundur që çdo shqiptar, pavarësisht vendndodhjes, të ketë mundësinë të shprehë vullnetin e tij. “Jemi ne që vijmë te ju, më vjen mirë që dhe këtë sic zotuam në krye të herës e bëmë realitet dhe tani cdo shqiptar e shqiptare që do të shprehet.”
Duke e cilësuar 11 majin si “fundin e historisë së Shqipërisë jashtë Evropës,” Rama argumentoi se këto zgjedhje i ofrojnë shqiptarëve një shans unik për të ndryshuar rrjedhën e historisë me votën e tyre. “Ishte thënë që në të parat zgjedhje, fati ynë fati I shqiptarëve të na sillte në një zgjedhje që është zgjedhje përfundimtare me historinë. Duke na dhënë ne shansin që me një votë tja ndryshojmë rrjedhën historisë.”
Referenca e Ramës ndaj “mustaqeve të Kujtim Gjuzit” dhe “bufit” ishte një aluzion i qartë ndaj figurave të opozitës, duke i paraqitur ata si pengesa të parëndësishme në rrugën e Shqipërisë drejt integrimit europian. Ai theksoi se fokusi duhet të jetë tek e ardhmja e vendit brenda Bashkimit Europian dhe jo tek personazhet apo detajet e vogla politike.
Takimi i Ramës në Milano me emigrantët shqiptarë vjen në një kohë kyçe të fushatës elektorale, duke synuar të mobilizojë votën e diasporës, e cila për herë të parë do të ketë mundësinë të votojë nga vendbanimi i tyre. Mesazhi i kryeministrit ishte i qartë: 11 maji është një moment historik për të vulosur fatin europian të Shqipërisë dhe kjo nuk duhet të humbasë për arsye të parëndësishme politike.