Pas vrasjes së Gjovalin Prendit, babait të Roan Brahimit, i cili njihej si kundërshtar i Ervis Martinajt, gazetarja Etleva Delia ka ngritur alarmin për një “rivitalizim” të mundshëm të grupit të Martinajt. Roan Brahimi u vra një vit më parë në Athinë.
Gazetarja, autore e emisionit “Gjërat Tona” në ABC News, theksoi se pavarësisht zhdukjes së Ervis Martinajt prej afro tre vitesh dhe mungesës së informacionit mbi fatin e tij, duket se njerëzit e tij të besuar janë sërish aktivë. Martinaj, i njohur si “mbreti i lojërave të fatit”, rezulton ende i zhdukur dhe në kërkim për dy dosje të rëndësishme, “Metamorfoza” dhe “Revanshi”, ku ai hetohet si organizator dhe urdhërues vrasjesh.
Delia shtoi se dyshohet se njerëz pranë Martinajt veprojnë aktualisht në Greqi dhe Shqipëri. Ajo përmendi Eljon Haton si një nga personat e besuar të tij, ndaj të cilit janë ndërmarrë disa operacione arrestimi, por pa sukses.
“Jo vetëm që nuk ka patur version zyrtar për fatin e Martinaj, por vazhdon të jetë në kërkim për dhe në hetim dy dosje ‘Metamorfoza’ dhe ‘Revanshi’, që është organizator dhe urdhërues vrasjesh. Hetimet vijojnë edhe pse nuk ka një përgjigje për fatin e tij, nëse është gjallë apo ka vdekur. Ka njerëz të besuar, që ishin me të dhe janë gjallë dhe janë në veprim,” u shpreh gazetarja. “Dyshohet se mund të kenë marrë pjesë edhe në ngjarje kriminale, njëri ka dyshime që vepron në Greqi dhe tjetri Eljon Hato, ku janë bërë operacione për kapjen e tij. Unë besoj variantin se është rivitalizuar grupi i tij.”
Këto deklarata ngrenë shqetësime të reja në lidhje me aktivitetin e mundshëm të grupit të Ervis Martinajt dhe implikimet e tij në ngjarjet e fundit kriminale në vend.