Kryeministri izraelit, Benjamin Netanyahu, ka pranuar propozimin më të fundit të Shteteve të Bashkuara të Amerikës për një armëpushim në Gaza, sipas raportimeve të mediave izraelite. Ky zhvillim vjen pas optimizmit të shprehur nga i dërguari i SHBA-së për Lindjen e Mesme, Steve Witkoff, lidhur me ndërmjetësimin e një marrëveshjeje për t’i dhënë fund konfliktit që ka zgjatur më shumë se 19 muaj.
Netanyahu thuhet se e ka pranuar këtë propozim gjatë një takimi me familjet e pengjeve të mbajtura nga Hamasi, duke deklaruar se “Izraeli pranon skicën e re të Witkoff-it”. Ndërkohë, Hamasi konfirmoi të enjten se kishte marrë propozimin e ri për armëpushim nga ndërmjetësit dhe po e shqyrtonte atë.
Witkoff shprehu më parë “ndjenja shumë të mira për arritjen e një zgjidhjeje afatgjatë – një armëpushim të përkohshëm, një zgjidhje paqësore të atij konflikti”, duke lënë të kuptohet përparim të rëndësishëm në negociata.
