Dhjetë vite heshtje dhe mister mbështjellën vrasjen e Elvis Dedes në 5 qershor 2012, në rrugën dytësore mes Shkëmbit të Kavajës dhe Durrësit. Fillimisht u hodh pista e prishjes së pazareve të drogës, duke e etiketuar viktimën si baron droge. Më vonë, policia evokoi edhe motivin e një vajze, por hetimet u mbyllën shpejt në arkivat e prokurorisë së Durrësit, duke iu bashkuar listës së gjatë të ekzekutimeve të pazbardhura.
Por, këmbëngulja e nënës së Elvisit për të zbuluar vrasësit e të birit do të paguhej me jetë. Ajo denoncoi me emër personat që dyshonte, por një vit më vonë, edhe Fatmira Dede u vra, duke e thelluar edhe më shumë misterin dhe duke lënë dy viktima pa drejtësi. Edhe kësaj here, policia dhe prokuroria heshtën, duke arkivuar një tjetër krim të rëndë.
Kthesa e papritur erdhi fiks dhjetë vjet më vonë. Nuredin Dumani, një emër i njohur tashmë për botën e krimit, në përpjekje për t’u bërë i penduar, zbuloi detaje tronditëse mbi vrasjen e Elvis Dedes. Sipas dëshmisë së tij në Prokurorinë e Posaçme, ishte Henrik Hoxhaj, një emër deri atëherë i panjohur, ai që i kishte rrëfyer krimin. Hoxhaj, i cili gjithashtu po tentonte statusin e të penduarit, kishte listuar dhjetëra krime, duke përfshirë edhe vrasjen e Elvis Dedes.
Por zbulimet nuk përfunduan këtu. Nuredin Dumani tregoi gjithashtu për vrasjen e nënës së Elvisit, Fatmira Dede. Motivi, sipas dëshmisë së tij, ishte i qartë: nëse Elvisi u vra për çështje pronësie karburanti, nëna e tij u eliminua sepse nuk ndalej së kërkuari drejtësi dhe arrestimin e vrasësve. Dumani madje zbuloi se vrasësit kishin lidhje të forta me policë dhe njerëz të pushtetit, duke shpjeguar heshtjen e autoriteteve.
Dje, në Gjykatën e Posaçme, Dumani u rikthye te vrasja e Elvis Dedes dhe bisedat që kishte pasur me autorët. Ai dëshmoi se Henrik Hoxha i kishte thënë se në momentin e vrasjes ishte “tapë” (shumë i dehur). Gjithashtu, Dumani pohoi se bashkë me Hoxhën në atentat kishte marrë pjesë edhe Festim Qoli, i njohur ndryshe si “Festa”, i cili dyshohet të ketë organizuar edhe vrasjen e nënës së Elvisit një vit më vonë. Interesant është fakti që Dumani e përshkroi Festim Qolin si mik të ngushtë, duke shtuar se në lokalin e tij frekuentoheshin shumë policë.
Në dosjen e prokurorisë së Durrësit për vrasjen e Elvis Dedes, ekziston edhe një dëshmi e Festim Qolit, dhënë dy vjet pas vrasjes së Elvisit dhe një vit pas vrasjes së nënës së tij. Në këtë dëshmi, Qoli pohon se shoqërohej çdo ditë me Elvisin dhe se një ditë para vrasjes kishin pirë bashkë deri në orët e vona. Ai pranon se Elvisi dukej i shqetësuar, por nuk i kishte treguar arsyen. Qoli gjithashtu deklaron se pas vrasjes ishte fshehur, pasi kishte dëgjuar se të afërm të Elvisit e kërkonin për t’u hakmarrë, por ai mohon të jetë autori i vrasjes.
Rrëfimet e Nuredin Dumanit kanë hedhur dritë të re mbi një krim të dyfishtë që për vite me radhë mbeti i pazbardhur. Tani, drejtësia ndodhet përballë dëshmive të vetë autorëve, të cilët në këmbim të statusit të të penduarit, kanë pranuar rolin e tyre në këtë sagë tragjike. Detajet e lidhjeve të tyre me persona të pushtetit dhe policinë pritet të jenë pjesë e hetimeve të mëtejshme, duke shpresuar që më në fund, familja Dede të marrë drejtësinë e munguar për kaq shumë kohë.