Pas disa muajsh në kërkim, Bujar (Marsel) Shega, i konsideruar si ‘truri’ financiar i organizatës kriminale të drejtuar nga Suel Çela, është ekstraduar nga Italia drejt Shqipërisë. Shega u ndalua në shtetin fqinj në nëntorin e kaluar, menjëherë pas shpalljes në kërkim ndërkombëtar nga Prokuroria e Posaçme kundër Korrupsionit dhe Krimit të Organizuar (SPAK), në kuadër të operacionit të gjerë që goditi grupin e Suel Çelës.
Emri i 52-vjeçarit me dy identitete ishte pjesë e 21 urdhër-arresteve të lëshuara nga SPAK në nëntorin e kaluar, kur u zbulua dhe godit organizata e fuqishme kriminale. Gjykata e Posaçme kundër Korrupsionit dhe Krimit të Organizuar (GJKKO) kishte caktuar ndaj tij masën e sigurisë “Arrest në burg”, për akuza të rënda si “Trafikimi i lëndëve narkotike” dhe “Pastrimi i produkteve të veprës penale ose veprimtarisë kriminale”, të kryera në kuadër të organizatës kriminale.
Bujar Shega, i cili figuron edhe si Marsel Shega, dyshohet të ketë pasur një rol qendror në pastrimin e parave të fituara në mënyrë të paligjshme nga organizata e Suel Çelës. Ai ishte administrator i dy kompanive, Viola Green dhe Wonder Green, të cilat sipas hetimeve, shërbenin si fasadë për të kamufluar origjinën e parave.
Autoritetet hetimore dyshojnë se Shega nuk pastronte vetëm paratë e grupit të Suel Çelës, por edhe të grupeve të tjera kriminale, përfshirë një grup me bazë në Dubai, i cili kishte investuar shuma të konsiderueshme në pasuri të paluajtshme në Tiranë.
Ekstradimi i Bujar Shegës në Shqipëri shënon një hap të rëndësishëm në operacionin e SPAK kundër organizatës së Suel Çelës. Prania e tij pritet të hedhë më shumë dritë mbi mekanizmat financiarë të grupit kriminal dhe lidhjet e tij me aktorë të tjerë brenda dhe jashtë vendit. Hetimet e SPAK në këtë çështje vijojnë, me synimin për të zbardhur plotësisht veprimtarinë e kësaj organizate dhe për të vënë para drejtësisë të gjithë personat e përfshirë.