MILANO – Një mbrëmje futbolli e jashtëzakonshme u zhvillua në “San Siro”, ku Interi arriti të sigurojë biletën e parë për finalen e Champions League pas një triumfi 4-3 ndaj Barcelonës në një ndeshje që do të mbahet mend gjatë. Një përballje plot emocione, përmbysje dhe gola spektakolarë që mbajti frymën e tifozëve deri në sekondën e fundit.
Interi e nisi ndeshjen me një ritëm të furishëm, duke dominuar pjesën e parë dhe duke shkuar në dhomat e zhveshjes me një avantazh të dyfishtë. Sulmuesi argjentinas Lautaro Martinez zhbllokoi rezultatin, ndërsa mesfushori turk Hakan Çalhanoglu dyfishoi avantazhin e zikaltërve, duke shokuar ekipin katalanas.
Megjithatë, Barcelona nuk u dorëzua dhe tregoi karakterin e saj në pjesën e dytë. Vetëm pak minuta pas rifillimit të lojës, Garcia ngushtoi diferencën, duke injektuar shpresë në kampin blaugrana. Më pas, ishte radha e Olmos të barazonte shifrat, duke e kthyer ndeshjen në një duel të hapur. Kur dukej se Barcelona kishte momentum, Raphinha realizoi golin e përmbysjes, duke çuar në delir tifozët spanjollë.
Por Interi nuk ishte gati të dorëzohej. Me zemër dhe vendosmëri, zikaltërit u hodhën në sulm dhe Acerbi arriti të barazojë sërish rezultatin, duke e dërguar ndeshjen në kohën shtesë.
Në 30 minutat shtesë, tensioni ishte i prekshëm. Interi tregoi cinizëm dhe Davide Frattesi shënoi golin e fitores, duke shpërthyer në festë stadiumin “San Siro”. Një gol që vulosi kualifikimin e Interit në finale, duke lënë Barcelonën të mposhtur pas një beteje të ashpër me shtatë gola.
Me këtë fitore dramatike, Interi pret tani të njohë kundërshtarin e tij në finalen e madhe të Champions League, i cili do të dalë nga çifti tjetër gjysmëfinal PSG-Arsenal. Një finale që pritet me padurim pas kësaj ndeshjeje spektakolare në Milano.