Tiranë, Shqipëri – Deputeti i Partisë Demokratike, Dashnor Sula, ka folur hapur mbi arsyet që çuan në ftohjen e marrëdhënies së tij me partinë dhe ka zbuluar se ka marrë telefonata nga figura të ndryshme politike, duke përfshirë edhe përfaqësues të partive të tjera. Megjithëse ndjen se i është bërë padrejtësi, Sula ka deklaruar se do të “frenojë gojën” deri më 11 maj, duke mos dashur të tregohet i inatosur në këtë periudhë.
Sula shpjegoi se mosmarrëveshjet me Partinë Demokratike kanë nisur pas humbjes së zgjedhjeve të vitit 2021, kur Lulzim Basha ishte në krye, dhe kanë vijuar me qëndrimet e ndryshme që ai ka pasur në lidhje me foltoren e ish-kryedemokratit Sali Berisha.
“Mua këto dy javët e fundit nuk më kishte shkuar ndër mend që do të merrja telefonata nga të gjitha krahët e partive politike apo njerëz që janë në lista. Edhe kjo po materializohet sot edhe brenda vetë listës, sepse kodin ashtu si e bën, ka një konflikt të brendshëm për votat me njëri-tjetrin. Thonë ma jep mua votën, mos ja jep atij tjetrit,” – u shpreh Sula, duke nënvizuar dinamikat e brendshme dhe interesimin e partive të tjera për situatën e tij.
Ai shtoi se gjatë karrierës së tij politike ka vërejtur krijimin e grupeve dhe lobingjeve brenda forcave politike, të cilat sipas tij, shpesh favorizojnë karrierën jo bazuar në meritokraci, por në lidhje të caktuara. Sula gjithashtu përmendi periudhën pas humbjes së zgjedhjeve të 25 prillit, duke thënë se Basha u mbajt në krye të PD-së nga Berisha dhe njerëzit afër tij. Ai po ashtu konfirmoi se ka pasur qëndrime të ndryshme në lidhje me foltoren, duke theksuar se ato nuk kanë qenë të dhunshme si të disa kolegëve të tij aktualë në politikë.
Vendimi i Dash Sules për të mos bërë deklarata të mëtejshme deri në 11 maj lë të hapur spekulimet mbi të ardhmen e tij politike dhe mundësinë e ndonjë lëvizjeje të mundshme pas kësaj date. Telefonatat e marra nga të gjitha krahët politikë tregojnë për interesimin e gjerë për pozicionin e tij dhe ndikimin që ai mund të ketë në zhvillimet e ardhshme politike në vend.