Një zhvillim i papritur ka tronditur skenën politike dhe atë të kronikës së zezë në Shqipëri. Eris Mehmetaj, djali i ish-deputetit të Partisë Demokratike (1997-2000) Xhevdet Mehmetaj, është arrestuar dy ditë më parë në Tiranë. Ai dyshohet të jetë i implikuar në atentatin e ndodhur në Vlorë, ku u ekzekutua Rustem Hoxha në mëngjesin e së dielës.
Eris Mehmetaj, i cili njihet edhe si koka e fushatës elektorale të Sali Berishës në njësinë numër 2 në Tiranë, akuzohet nga Policia e Shtetit se ka ndihmuar në ekzekutimin e Renato Hoxhajt, ngjarje e ndodhur më 27 prill. Burime nga blutë bëjnë me dije se grupi hetimor dyshon se Mehmetaj i ka siguruar automjetin autorit të vrasjes.
Babai i të arrestuarit, Xhevdet Mehmetaj, pas rikthimit të Sali Berishës në vitin 2005, ka mbajtur postin e sekretarit të Përgjithshëm në Ministrinë e Transporteve. Ai ka qenë gjithashtu një eksponent i rëndësishëm i lëvizjes “Foltore” dhe më pas i “Rithemelimit” të Berishës pas shpalljes “non grata” të këtij të fundit. Aktualisht, Xhevdet Mehmetaj konsiderohet një figurë kryesore e PD dhe drejtonte një nga shtabet elektorale në Tiranë.
Ndërkohë, i biri i tij, Eris Mehmetaj, përveç angazhimit politik, rezulton të kishte aktivitet në fushën e shitblerjes së pronave. Ai gjithashtu thuhet se ka qenë mik i afërt me Roan Brahimin, i ekzekutuar në Athinë një vit më parë, ndërsa babai i Brahimit u vra vetëm pak ditë më parë.
Sipas hetimeve, Eris Mehmetaj dyshohet se ia ka dorëzuar automjetin autorit të vrasjes së 58-vjeçarit Rustem Hoxha para krimit, duke ndërruar edhe targat e mjetit për të shmangur identifikimin nga policia.
Arrestimi i Mehmetajt u krye një natë më parë, dhe policia ka sekuestruar telefonin e tij, ku besohet të ketë prova të rëndësishme për zbardhjen e vrasjes së Renato Hoxhajt. Dyshimet paraprake sugjerojnë se vrasja e Hoxhajt mund të jetë porositur nga një grup kriminal që operon nga Emiratet e Bashkuara Arabe. Kjo lidhje forcohet edhe nga një vështrim në profilin e rrjeteve sociale të Eris Mehmetajt, ku ai ka postuar foto nga Dubai vetëm një muaj më parë, duke ekspozuar një jetë luksoze.
Renato Hoxhaj, 58 vjeç, u ekzekutua me tre plumba pranë banesës së tij në Vlorë. Bashkëjetuesja e tij dëgjoi të shtënat dhe e gjeti të pajetë në rrugë. Policia ka marrë në pyetje disa persona lidhur me ngjarjen, përfshirë edhe bashkëjetuesen e viktimës.
Arrestimi i Eris Mehmetajt, një figurë e njohur brenda Partisë Demokratike dhe koka e fushatës së njësisë numër 2 në Tiranë për Sali Berishën, pritet të ketë jehonë të madhe në politikën shqiptare dhe të hedhë dritë të re mbi ngjarjen e rëndë në Vlorë. Hetimet vijojnë për të zbardhur të plotë motivet dhe rrethanat e kësaj vrasjeje.