Një rritje shqetësuese e rasteve me anemi po vihet re në Shqipëri, veçanërisht tek fëmijët, adoleshentët dhe gratë në moshë riprodhuese. Sipas mjekes Manika Kreka nga QSUT, afërsisht 40-50% e fëmijëve deri në moshën 6 vjeç janë anemikë, kryesisht për shkak të mungesës së hekurit.
“Shifrat tona janë në përputhje me statistikat botërore,” theksoi Kreka, duke shtuar se “anemia më e përhapur është e lehtë deri në të moderuar, por shqetësuese është rritja e rasteve në grupmosha gjithnjë e më të reja.” Problemi prek gjithashtu vajzat e reja dhe 1 në 3 gra në moshë riprodhuese, duke u lidhur kryesisht me kequshqyerjen dhe virozat sezonale.
Mjekët paralajmërojnë se ushqimet e gatshme po zëvendësojnë ushqimin e shëndetshëm, ndërsa infeksionet e shpeshta tek fëmijët përkeqësojnë gjendjen shëndetësore. Simptomat e anemisë përfshijnë lodhje të vazhdueshme, dobësi fizike, marramendje dhe vështirësi në frymëmarrje. Një fëmijë me anemi është “më i plogësht, më pak i përqendruar dhe shpesh agresiv në sjellje.”
Organizata Botërore e Shëndetësisë thekson se anemia ndikon jo vetëm në shëndetin dhe zhvillimin e fëmijëve, por edhe në performancën shkollore dhe produktivitetin ekonomik të të rriturve, duke sjellë pasoja për të gjithë familjen. Përballë kësaj situate, mjekët kërkojnë ndërhyrje urgjente për edukimin ushqimor dhe kontrolle të rregullta mjekësore për të parandaluar përhapjen e mëtejshme të anemisë.