Prokuroria e Posaçme Kundër Korrupsionit dhe Krimit të Organizuar (SPAK) ka komunikuar sot një akuzë të re ndaj kryebashkiakut të Tiranës, Erion Veliaj. Akuza e re lidhet me futjen e sendeve të ndaluara në ambientet e paraburgimit.
Sipas raportimeve të gazetares Klodiana Lala, akuza e re vjen si pasojë e përdorimit të telefonit të një polici nga ana e Veliajt, gjatë kohës që ai po shoqërohej për në ambientet e paraburgimit. Përdorimi i telefonit në automjetin e transferimit konsiderohet si futje e sendeve të huaja në ambientin e paraburgimit, pasi automjeti bie nën juridiksionin e këtij të fundit.
Kjo akuzë vjen në një moment kur Veliaj u paraqit në SPAK për të dhënë shpjegime për hetimet që po zhvillohen ndaj tij. Ai qëndroi rreth një orë e 30 minuta në Prokurorinë e Posaçme, ku u pyet nga prokurorët.
Kjo është hera e parë që kryebashkiaku Veliaj merret në pyetje pas caktimit të masës së sigurisë “arrest me burg” nga gjykata dhe transferimit të tij në paraburgimin e Durrësit.
Veliaj akuzohet për veprat penale të “korrupsionit pasiv të funksionarëve të lartë shtetërorë ose të zgjedhurve vendorë” në 9 raste, si dhe “pastrimit të produkteve të veprës penale ose veprimtarisë kriminale”. Akuza e re nga SPAK rëndon më tej pozitat e tij ligjore.