Presidenti amerikan Donald Trump ka lënë të kuptohet se Shtetet e Bashkuara mund të tërhiqen nga përpjekjet për të ndërmjetësuar një marrëveshje paqeje midis Rusisë dhe Ukrainës, nëse palët e përfshira në konflikt “e vështirësojnë” procesin.
Deklarata e Trump erdhi gjatë një bisede me gazetarët në ceremoninë e betimit të Mehmet Ozit si administrator i Qendrave për Shërbimet Medicare dhe Medicaid.
Duke folur për perspektivën e një marrëveshjeje paqeje, Trump tha: “Ne do ta arrijmë atë në mënyrë ideale.” Megjithatë, ai shtoi një paralajmërim të rëndësishëm: “Nëse për ndonjë arsye ndonjëra nga dy palët e vështirëson shumë… ne do të heqim dorë.” Ai përdori termin “take a pass”, që zakonisht nënkupton refuzimin e një mundësie.
Trump shprehu shpresën se një skenar i tillë nuk do të ishte i nevojshëm, duke theksuar se ai besonte se kishte një “shans të mirë” për të “zgjidhur problemin”.
Këto komente ngrenë pikëpyetje mbi rolin e SHBA-së në përpjekjet për t’i dhënë fund konfliktit në Ukrainë dhe nëse administrata e Trump do të mbajë një qasje aktive nëse negociatat bëhen të vështira. Deklarata e tij sugjeron një qasje të kushtëzuar, ku angazhimi i SHBA-së varet nga bashkëpunimi i palëve ndërluftuese.