Vuçiç takon Trump Jr. në Beograd, flasin për marrëdhëniet dypalëshe dhe ekonominë
Presidenti i Serbisë, Aleksandar Vuçiç, ka zhvilluar një takim me Donald Trump Jr., djalin e ish-presidentit amerikan Donald Trump, gjatë vizitës së këtij të fundit në Beograd. Takimi ka vënë në fokus marrëdhëniet dypalëshe mes Serbisë dhe Shteteve të Bashkuara, si dhe çështjet aktuale që formësojnë skenën politike dhe ekonomike globale.
Vuçiç ka ndarë detaje nga takimi përmes një postimi në llogarinë e tij në Instagram, duke theksuar rëndësinë e marrëdhënieve ekonomike dhe politike mes dy vendeve. Ai ka theksuar gjithashtu rëndësinë e bashkëpunimit strategjik dhe projekteve të përbashkëta në vitet e ardhshme, duke e konsideruar takimin si simbol të angazhimit për forcimin e marrëdhënieve dypalëshe.
“Një bisedë e përzemërt me Donald Trump Jr., djalin e Presidentit të Shteteve të Bashkuara, Donald Trump, për marrëdhëniet dypalëshe midis Serbisë dhe Shteteve të Bashkuara dhe temat aktuale që formësojnë skenën politike dhe ekonomike globale. Theksova rëndësinë e marrëdhënieve ekonomike dhe politike ndërmjet Serbisë dhe Shteteve të Bashkuara dhe theksova rëndësinë e bashkëpunimit strategjik mes dy vendeve dhe projekteve të përbashkëta në vitet e ardhshme. Ky takim simbolizon angazhimin për forcimin e marrëdhënieve dypalëshe dhe punën së bashku për të adresuar sfidat globale,” shkroi Vuçiç.
Vizita e Trump Jr. në Beograd vjen në një kohë kur lidhjet ekonomike mes Serbisë dhe familjes Trump janë në rritje. Ai kishte vizituar Beogradin edhe në shtator 2024, duke diskutuar me biznesmenë serbë për investime potenciale. Ndërkohë, dhëndri i Trumpit, Jared Kushner, ka nisur një projekt biznesi në Beograd, me një kontratë të nënshkruar në maj 2024 për ndërtimin e një kompleksi biznesor dhe rezidencial në vendin e ish-Shtabit të Përgjithshëm të Ushtrisë Jugosllave.