Bisedimet e zhvilluara në kryeqytetin e Arabisë Saudite, Riad, midis delegacioneve të Rusisë dhe Shteteve të Bashkuara, kanë përfunduar pas rreth 12 orësh diskutime intensive. Sipas raportimeve të agjencisë ruse TASS, palët janë në pritje të arritjes së një marrëveshjeje për një deklaratë të përbashkët.
Burime nga delegacioni i Moskës kanë konfirmuar se konsultimet pritet të përfundojnë së shpejti dhe se negociatorët janë duke punuar për të finalizuar një deklaratë të përbashkët.
“Konsultimet pritet të përfundojnë së shpejti. Negociatorët po përpiqen të bien dakord për një deklaratë të përbashkët,” raportoi agjencia TASS.
Ky takim vjen në një kohë të tensionuar në marrëdhëniet mes SHBA-së dhe Rusisë, me një sërë çështjesh globale dhe rajonale në axhendë. Detajet e sakta të temave të diskutuara nuk janë bërë ende publike, por pritet që deklarata e përbashkët të hedhë dritë mbi rezultatet e bisedimeve.
Pritet që komuniteti ndërkombëtar të ndjekë me vëmendje rezultatet e këtij takimi, duke shpresuar për një përparim në dialogun midis dy fuqive botërore.