Një 44-vjeçar me iniciale D. P. është arrestuar në flagrancë nga policia e Tiranës pasi akuzohet se ka rrëmbyer dhe dhunuar një 31-vjeçar. Ngjarja e rëndë ka ndodhur pasi 44-vjeçari, për motive ende të paqarta, ka marrë me forcë në automjetin e tij shtetasin L. M., 31 vjeç.
Sipas njoftimit të policisë, shërbimet e Komisariatit të Policisë Nr. 6, menjëherë pas marrjes së njoftimit për rrëmbimin, organizuan punën për identifikimin dhe kapjen e autorit. Falë veprimeve të shpejta të specialistëve për Hetimin e Krimeve, 44-vjeçari u kap në flagrancë.
Hetimet paraprake tregojnë se autori e ka mbajtur peng 31-vjeçarin në automjet për rreth dy orë, gjatë së cilës kohë e ka goditur me grushte. Policia nuk ka bërë ende të ditur motivet e plota të këtij akti të dhunshëm.
“Mori me forcë në automjet, një 31-vjeçar, i hoqi lirinë dhe e dhunoi, si rezultat i veprimeve të shpejta të Policisë, kapet në flagrancë dhe vihet në pranga 44-vjeçari. Shërbimet e Komisariatit të Policisë Nr. 6, pasi morën njoftim se një 31-vjeçar ishte marrë me forcë, në automjet, nga një shtetas, organizuan menjëherë punën për identifikimin e autorit dhe vënien e tij përpara përgjegjësisë ligjore. Si rezultat i veprimeve të shpejta të kryera nga specialistët për Hetimin e Krimeve të Komisariatit të Policisë Nr. 6, u kap në flagrancë dhe u vu në pranga shtetasi D. P., 44 vjeç, banues në Tiranë,” thuhet në njoftimin e policisë.
Materialet procedurale në ngarkim të 44-vjeçarit i janë referuar Prokurorisë së Rrethit Gjyqësor Tiranë për veprime të mëtejshme ligjore. Pritet që hetimet të zbardhin plotësisht rrethanat dhe motivet e kësaj ngjarjeje të rëndë.