Tiranë – Një zhvillim i rëndësishëm ka ndodhur sot në Gjykatën Kundër Korrupsionit dhe Krimit të Organizuar (GJKKO), ku u mbajt seanca gjyqësore për dosjen “Sterilizimi”. Në qendër të vëmendjes ishte ish-ministri i Shëndetësisë, Ilir Beqaj, ndërsa prokurori i çështjes, Edvin Kondili, ka kërkuar që Beqaj, Klodian Rrjepaj dhe Ilir Rrapaj të gjykohen jo vetëm për “vjedhje duke shpërdoruar detyrën”, por edhe për veprën penale të “grupit të strukturuar kriminal”.
Kjo kërkesë e re e Prokurorisë ka shkaktuar reagime të forta nga pala mbrojtëse. Avokati i Beqajt, Ermal Yzeiraj, kundërshtoi fuqishëm, duke deklaruar se ai dhe klienti i tij janë të paqartë mbi akuzën. “Unë jam i paqartë për akuzat, pasi prokuroria nuk e ka saktësuar akuzën, sepse verbalisht thonë vjedhje duke shpërdoruar detyrën dhe grup kriminal, ndërsa me shkrim është shpërdorim detyre. Unë jam i paqartë për çfarë do të mbrohem,” u shpreh avokati Yzeiraj.
Reagimi i Ish-Ministrit Beqaj
Vetë ish-ministri Beqaj shprehu indinjatën e tij, duke theksuar se kjo akuzë e re nuk i ishte komunikuar kurrë më parë. “Unë jam përgatitur për veprën penale të shpërdorimit të detyrës. Siç më ka arsyetuar për shpërdorim detyre dhe duhet të arsyetojë pse është vjedhje. Ju s’e keni thënë kurrë këtë akuzë, keni thënë vetëm fjalën pranojmë. Pa një formulim të saktë të akuzës nuk mund të përgjigjem. Në 3 krerë të ndryshëm na kanë vënë nene të ndryshme të Kodit Penal. Ne jemi bërë si autoshkollë, unë nuk bëj dot mbrojtje efektive pa një akuzë të shkruar,” tha Beqaj, duke vënë në pikëpyetje qartësinë dhe saktësinë e akuzave të Prokurorisë.