Ambasada e Shteteve të Bashkuara të Amerikës në Tiranë ka lëshuar një paralajmërim të rëndësishëm për të gjithë qytetarët shqiptarë që planifikojnë të aplikojnë për vizë amerikane. Ambasada u bën thirrje qytetarëve të jenë të kujdesshëm dhe të mos u besojnë personave apo agjencive që kërkojnë pagesa në këmbim të ndihmës për aplikimin e vizës.
Nëpërmjet një mesazhi të qartë, Ambasada thekson: “Sot ne jemi këtu për t’ju thënë të mos i besoni askujt që ju thotë se duhet të paguani për ndihmë për të aplikuar për një vizë!”
Paralajmërimi vijon duke theksuar rreziqet që vijnë nga përdorimi i agjentëve të vizave të cilët mund të angazhohen në mashtrime ose të japin informacione të pavërteta në aplikim. Ambasada është e prerë: “Mos harroni! Askush nuk mund t’iu garantojë një vizë dhe mund të keni pasoja negative për aplikimin tuaj për vizë nëse lidheni me një agjent vizash që angazhohet me mashtrim ose jep informacione të pavërteta në aplikimin tuaj!”
Për të mbrojtur qytetarët nga këto praktika të dëmshme, Ambasada Amerikane këshillon: “Pra kurseni paratë dhe mbroni të dhënat tuaja personale duke aplikuar vetë ose me ndihmën e një miku apo anëtari të familjes tuaj”.
Më tej, Ambasada rekomandon shmangien e agjencive të vizave dhe inkurajon aplikantët të ndjekin udhëzimet e detajuara që ofrohen në një video shpjeguese. Kjo video synon të udhëzojë hap pas hapi aplikantët gjatë gjithë procesit, duke ofruar këshilla të dobishme dhe duke theksuar detajet kryesore për plotësimin e saktë të aplikimit.
Në fund të paralajmërimit, Ambasada thekson përgjegjësinë individuale të aplikantëve: “Kini kujdes kur të aplikoni – JU jeni të vetmit përgjegjës për informacionin që dërgoni, edhe nëse e plotësoni me një agjenci.”
Ky paralajmërim i Ambasadës Amerikane në Tiranë synon të rrisë ndërgjegjësimin e qytetarëve dhe t’i mbrojë ata nga mashtrimet e mundshme gjatë procesit të aplikimit për vizë, duke i inkurajuar të ndjekin rrugët zyrtare dhe të besueshme për të realizuar këtë proces.