Tiranë, Shqipëri – Këtë të dielë, nis zyrtarisht “Defender Europe 25”, një nga stërvitjet ushtarake shumëkombëshe më të mëdha në kontinentin evropian në dekadat e fundit. Shqipëria do të jetë një nga vendet mikpritëse të kësaj stërvitjeje, e cila do të zgjasë deri më 9 qershor.
Komanda Evropiane e SHBA (EUCOM) është në krye të këtij operacioni ambicioz, që ka si qëllim kryesor rritjen e gatishmërisë dhe aftësinë për veprim të koordinuar midis forcave të SHBA-së, NATO-s dhe vendeve partnere. Gjeneral brigade Ardian Lilo, Drejtor i Shtabit të Përgjithshëm të Forcave të Armatosura të Shqipërisë, shpjegoi objektivat thelbësore të stërvitjes për Klan News.
Objektivat dhe Pjesëmarrja e Stërvitjes
“Defender Europe ’25”, që zhvillohet për herë të tretë në Shqipëri, është organizuar nga Komanda e Ushtrisë Amerikane në Evropë. Elementi më i rëndësishëm në vendin tonë do të jetë stërvitja “Immediate Response ’25”. Gjeneral Lilo theksoi se objektivat kryesorë janë:
- Dislokueshmëria: Aftësia për të lëvizur shpejt trupat nga një pikë në tjetrën.
- Testimi i kapaciteteve: Çertifikimi dhe rritja e gatishmërisë.
- Ndërveprueshmëria: Përmirësimi i bashkëpunimit mes aleatëve dhe vendeve partnere.
Në kuadër të “Immediate Response ’25”, do të marrin pjesë 12,000 trupa nga tetë vende të ndryshme, duke përfshirë vende rajonale dhe Shtetet e Bashkuara.
Stërvitja do të fokusohet në disa zona kyçe. Në Zallherr do të ndodhet komanda e brigadës shumëkombëshe shqiptare, e cila do të përfshijë ushtarakë amerikanë, trupa të Forcës së Sigurisë së Kosovës (FSK), pjesëtarë nga Kroacia, Mali i Zi dhe Forcat e Armatosura të Republikës së Shqipërisë. Këto forca do të dislokohen edhe në rajonin e Bizës dhe në Babai i Bokës në Kosovë.
Stërvitja do të përfshijë një përzierje të gjerë kapacitetesh, duke filluar nga elementët e luftimit si batalionet e këmbësorisë së lehtë, Task Forca e Kosovës nga FSK-ja, deri te elementë xhenierë, forca kibernetike, dhe kapacitete ajrore si helikopterë dhe dronë. Kjo stërvitje madhore nënkupton një angazhim të rëndësishëm të Shqipërisë në forcimin e sigurisë kolektive dhe bashkëpunimit ushtarak në rajon dhe më gjerë.