Ish-presidenti Ilir Meta dhe ish-kryeministri Sali Berisha kanë shpallur një front të përbashkët kundër Strukturës së Posaçme Anti-Korrupsion (SPAK), duke e akuzuar atë për veprime të njëanshme dhe të orkestruara politikisht. Gjatë një deklarate të përbashkët, dy liderët opozitarë u shprehën se pas 11 majit do të ndërmarrin një proces të “vettingut të drejtësisë”, duke synuar të rikthejnë balancën në sistemin gjyqësor.
“SPAK është kthyer në një instrument politik të qeverisë dhe po përdoret për të goditur kundërshtarët politikë. Pas 11 majit, do të bëjmë një vetting të vërtetë, që të pastrojmë drejtësinë nga kapja e Edi Ramës,” – deklaroi Meta.
Në të njëjtën linjë, Berisha e cilësoi SPAK-un si “një organizatë politike në shërbim të qeverisë”, duke shtuar se hetimet ndaj figurave të opozitës janë selektive dhe të motivuara politikisht. “Drejtësia e vërtetë do të vijë vetëm kur të pastrohet nga kapja e regjimit aktual,” – theksoi ai.