Tiranë, Shqipëri – Eksperti i kriminalistikës, Ervin Karamuço, ka ndarë me publikun një histori të rëndë që ilustron rrezikun e madh të varësisë ndaj drogës, veçanërisht tek të rinjtë. Gjatë një interviste në “Top Channel”, Karamuço rrëfeu për një rast dramatik të vajzës së një politikani shumë të lartë në Shqipëri, e cila përjetoi një periudhë të errët për shkak të përdorimit të lëndëve narkotike.
Karamuço tregoi se vajza e politikanit, i cili ka mbajtur pozicione kyçe në nivele të larta të qeverisjes ekzekutive gjatë 34 viteve të fundit, ishte larguar nga shtëpia dhe ishte bërë përdoruese droge. Në momentin e zhdukjes së saj, i gjithë aparati i Policisë së Shtetit u vu në lëvizje për ta gjetur.
“Politikan shumë i lartë në Shqipëri. Në këto 34 vite, ka qenë një politikan në nivele shumë të larta të qeverisjes ekzekutive. I iku vajza nga shtëpia, përdoruese droge. U angazhua e gjithë Policia e Shtetit në atë kohë, madje drejtorët e policisë u ndanë në linja të veçanta rrugore, që përfshinin qytete në juglindje, jugperëndim. Nga bregdetet, se andej arratisej,” – rrëfeu Karamuço, duke nënvizuar seriozitetin e situatës dhe mobilizimin e forcave të policisë.
Sipas ekspertit, shqetësimi i politikanit ishte jetik. “Ai qeveritari thoshte vetëm ma gjeni gjallë, se e dinte çfarë bënte ajo kur largohej. Ikte me javë të tëra.” Vajza u gjet më pas në një shtëpi të braktisur pranë Dhërmiut, e vetme dhe në kushte të mjerueshme, me shiringat pranë dhe pasi kishte konsumuar lëndë narkotike. Ajo u gjet rastësisht. Në atë kohë, vajza ishte 17 vjeçe.
Karamuço ndau me publikun edhe lajmin e mirë se vajza sot është rikthyer në jetë, megjithëse babai i saj ka ndërruar jetë. Ai e solli këtë histori të dhimbshme në vëmendje për të paralajmëruar mbi rrezikun e lëndëve narkotike dhe për të theksuar nevojën e shtuar për kontrolle, në mënyrë që këto substanca të mos përfundojnë në duart e të miturve. Historia e vajzës së politikanit të lartë shërben si një kambanë alarmi për familjet dhe shoqërinë në tërësi mbi pasojat shkatërruese të drogës.