Eksperti i kriminalistikës, Ervin Karamuço, ka hedhur dritë të re mbi vrasjen e 58-vjeçarit Renato Hoxhaj në Vlorë, duke sugjeruar se viktima mund të ketë qenë i përfshirë si informator për grupe kriminale. Në një intervistë për “Tirana Live” në ABC News, Karamuço u shpreh se autori i dyshuar i vrasjes mund të jetë një shtetas i huaj, i cili mund të jetë ndihmuar nga persona të tjerë për të kaluar kufirin drejt Greqisë.
“Kam përshtypjen që ky person ishte bërë problem i madh për këto grupe, që nuk janë në Vlorë, por në Emiratet e Bashkuara Arabe, një pjesë e tyre,” tha Karamuço, duke aluduar për porositësit e mundshëm të vrasjes. Ai shtoi se Hoxhaj kishte marrë masa sigurie, por fatkeqësisht ra viktimë e atentatit.
Sipas Karamuços, policia dyshon se autori i krimit është një i huaj, dhe po hetohen rrethanat e kalimit të tij kufitar. “Mund të jetë ndihmuar nga persona të tjerë, në terrenet malore për të kaluar në Greqi. Po kontrollohet edhe nga ana e palës greke, por nuk ka asnjë rezultat,” shpjegoi eksperti. Ai theksoi se viktima mund të ketë poseduar shumë informacione të rëndësishme për grupet kriminale.
Karamuço e cilësoi këtë vrasje si pjesë e veprimtarisë së grupeve transkombëtare, duke përfshirë bashkëpunimin mes bandave të ndryshme. Ai pohoi se policia e ka të dokumentuar faktin që vrasja e Vlorës është urdhëruar nga Dubai, madje ekziston urdhri i dhënë në celular.
Përveç Eris Mehmetajt, i cili është arrestuar tashmë për ndihmë të autorit, Karamuço beson se ka persona të tjerë që dyshohet se kanë marrë pjesë aktive në krim. Ai e vlerësoi vrasjen si “të lehtë për t’u realizuar, por me shumë gabime” nga ana e autorëve.
Deklaratat e Ervin Karamuços shtojnë një dimension të ri hetimit, duke e fokusuar vëmendjen edhe tek mundësia e përfshirjes së elementëve të huaj dhe rolit të mundshëm të viktimës si informator për autoritetet ose grupe rivale kriminale. Hetimet pritet të vijojnë për të zbardhur të gjitha rrethanat e kësaj ngjarjeje të rëndë.