Në Samitin Ekonomik Ndërkombëtar të mbajtur në Tiranë, Jared Kushner, ish-këshilltari i Shtëpisë së Bardhë dhe themeluesi i “Affinity Partners”, zbuloi detaje mbi investimin e tij të ardhshëm në Shqipëri, veçanërisht në ishullin e Sazanit.
Kushner, i cili foli nëpërmjet një lidhjeje të drejtpërdrejtë, tregoi se njohja e tij me Shqipërinë nisi në verën e vitit 2021, gjatë një udhëtimi me pushime në rajon. Ai shprehu admirimin e tij për bukurinë natyrore të vendit dhe potencialin e tij të pazbuluar.
“Isha me pushime kur lamë qeverinë në verën e vitit 2021, ishim në anijen e një shoku, para Korfuzit kaluam disa ditë në Shqipëri,” tha Kushner. “Në një nga netët, kryeministri Rama erdhi te anija. Nuk e kisha takuar kur ishim në qeveri, por u impresionova me vizionin se çfarë donte të bënte ai për Shqipërinë.”
Kushner gjithashtu komplimentoi kryeministrin Edi Rama, duke e quajtur atë një “politikan të zotë” dhe një “lider të fuqishëm dhe të zgjuar”. Ai theksoi se vizioni i Ramës për zhvillimin e Shqipërisë ishte një faktor kyç në vendimin e tij për të investuar në vend.
Për sa i përket projektit në Sazan, Kushner shpjegoi se pas vizitës së tij fillestare, ai dhe ekipi i tij kryen një studim të thellë të tregut dhe demografisë për një vit. Ky studim konfirmoi potencialin e madh të ishullit dhe rajonit për zhvillim turistik dhe investime të tjera.
“Shpenzuam një vit duke studiuar tregun, demografinë, a është një vend i pastër, a do të bëjë qeveria atë që premton. Sa më shumë që studiuam tregun aq më shumë u dashuruam me atë që do të krijonim dhe kuptuam që mjedisi ishte perfekt,” tha Kushner.
Investimi i Kushner në Sazan pritet të sjellë zhvillim të konsiderueshëm ekonomik dhe turistik në rajon, duke shfrytëzuar bukurinë natyrore dhe potencialin e pazbuluar të ishullit. Ky projekt gjithashtu tregon interesin në rritje të investitorëve ndërkombëtarë për Shqipërinë, e cila po bëhet një destinacion gjithnjë e më tërheqës për investime dhe turizëm.