Tiranë, Shqipëri – Pas një periudhe stabiliteti, inflacioni në Shqipëri shënoi rritje në muajin mars, duke arritur në 2.1%. Sipas të dhënave, shtytësi kryesor i këtij rritjeje ishin çmimet e ushqimeve, të cilat kontribuan me 1.04% në totalin e inflacionit.
Shtrenjtimi më i ndjeshëm u vu re tek produktet e bulmetit, vezët, zarzavatet (përfshirë patatet) dhe mishi. Eksperti i ekonomisë, Selim Blliku, shpjegoi se kjo rritje lidhet me situatën aktuale në këto sektorë, ndërsa nuk përjashtoi ndikimin e kursit të këmbimit për mallrat e importuara. Ai gjithashtu vuri në dukje se inflacioni vjetor mbetet ende poshtë objektivit të Bankës së Shqipërisë prej 3%.
Përveç ushqimeve, në vlerën totale të inflacionit ndikuan edhe kategoria e mobiljeve (0.26%), pijet alkoolike (0.22%), qiratë (0.17%) dhe argëtimi e kultura bashkë me baret e restorantet (0.16%). Zoti Blliku sugjeroi se me ardhjen e pranverës dhe rritjen e lëvizjes së qytetarëve, mund të shfaqet një trend i ri.
Megjithatë, faktorët e jashtëm gjeopolitikë shihen si një rrezik potencial për inflacionin në të ardhmen. Guvernatori i Bankës së Shqipërisë, Gent Sejko, në deklaratën e fundit për politikën monetare, shprehu shqetësimin se tarifat tregtare të vendosura nga SHBA, veçanërisht ndaj vendeve të BE-së, mund të ndikojnë në rritjen ekonomike dhe inflacionin e vendit.