Një incident i rëndë është regjistruar këtë të shtunë në aksin rrugor Lezhë-Milot, pranë fshatit Gajush. Një i ri, identiteti i të cilit nuk bëhet i ditur, nuk i është bindur urdhrit të policisë për të ndaluar mjetin që drejtonte.
Sipas informacioneve paraprake, efektivët e policisë kanë ndërhyrë duke qëlluar në drejtim të automjetit tip “Benz”. Fatmirësisht, nga ky incident nuk raportohet për persona të lënduar. Policia arriti të neutralizojë dhe ndalojë të riun, i cili është shoqëruar menjëherë në komisariat për të dhënë sqarime mbi ngjarjen.
Menjëherë pas ndalimit, kanë nisur hetimet për të zbardhur rrethanat dhe shkaqet që çuan në përshkallëzimin e situatës. Grupi hetimor po punon intensivisht për të zbuluar nëse ka pasur ndonjë veprim të paligjshëm nga ana e drejtuesit të mjetit dhe po verifikon të kaluarën e tij. Pamjet e siguruara nga News24 tregojnë momentin kur po kryhet këqyrja e automjetit në vendngjarje.