Ish-deputeti i Partisë Demokratike, Dashnor Sula, ka shprehur kritika të ashpra ndaj partisë së tij, duke vlerësuar se PD duhej të kishte ndërtuar një koalicion të gjerë me të gjitha forcat opozitare për të rritur ndjeshëm votat në zgjedhjet e fundit.
I ftuar në emisionin “LOG.” në News24, Sula pohoi se i ishte mohuar mundësia për të kandiduar nën siglën e PD-së, duke u ndjerë i përjashtuar dhe i pavlerësuar. “PD duhej të kishte bërë koalicion me të gjitha partitë e opozitës në mënyrë që të maksimalizonte votën. Nuk mund të punoja sepse më thanë se isha i pavlerë dhe nuk na duhesh më,” deklaroi Sula.
Ai theksoi se nuk ishte konsideruar as për listën e mbyllur dhe as për atë të hapur, duke u ndjerë i mosrespektuar nga partia. “Si është ajo shprehja, ‘nuk marr as gru me zor dhe as burrë me zor’. Unë jam te dera, ta mbyllin derën, nuk mund të hyj dot. Partia nuk më respektoi,” shtoi Sula.
Këto deklarata të Sules hedhin dritë mbi tensionet brenda PD-së dhe kritikat për strategjinë e partisë në zgjedhje, veçanërisht në lidhje me mungesën e një koalicioni të gjerë opozitar.