Kumbullat, këto “fruta guri” me bërthamë të fortë, janë një burim i mrekullueshëm lëndësh ushqyese me shumë përfitime shëndetësore. Ekzistojnë mbi 20 lloje, por dy më të zakonshmet janë kumbulla japoneze dhe ajo evropiane, të cilat gjenden edhe në Shqipëri dhe kanë përbërje ushqyese të ngjashme.
Të pasura me vitaminë K dhe përbërje fenolike, kumbullat, sidomos ato të thata (thana), luajnë një rol kyç në mbrojtjen e kockave. Ato përmbajnë antioksidantë që ndihmojnë në ruajtjen e densitetit kockor. Një studim i fundit sugjeroi se konsumimi i 50 gramëve kumbulla të thata çdo ditë mund të mbrojë densitetin kockor te gratë e reja që përdorin kontraceptivë oralë, duke promovuar aktivitetin e qelizave që riparojnë kockat.
Përveç kësaj, kumbullat janë burim i pasur i përbërjeve fenolike, si antocianinat, katekinat, kvercetinët dhe rutinat, të cilat ndihmojnë në kontrollimin e kolesterolit. Këto përbërje mbrojnë trupin nga stresi oksidativ dhe ndihmojnë në uljen e kolesterolit “të keq” (LDL) ndërsa rrisin atë “të mirë” (HDL).
Kumbullat gjithashtu mbështesin nivelet e shëndetshme të sheqerit në gjak. Katekinat përmirësojnë metabolizmin e yndyrave dhe mënyrën si trupi përpunon sheqernat, ndërsa vitamina K1 ndihmon në rregullimin e glukozës dhe insulinës.
Për ata që vuajnë nga kapsllëku, kumbullat e thata janë një zgjidhje natyrale dhe efektive. Të pasura me fibra dietike (si fibrat e tretshme, pektina dhe celuloza) dhe sorbitol, ato stimulojnë zorrët dhe lehtësojnë tretjen.
Së fundi, kumbullat kontribuojnë në funksionet kognitive dhe kujtesën. Ato janë burim i karotenoideve, veçanërisht luteinës dhe zeaksantinës, të cilat lidhen me shëndetin e trurit dhe mund të ndihmojnë në parandalimin e rënies së funksioneve mendore.
Në 100 gramë kumbulla të freskëta gjenden rreth 46 kalori, 1.4 gramë fibra dhe 6.4 mikrogramë vitaminë K. Kumbullat e thata, duke qenë më të përqendruara, ofrojnë edhe më shumë fibra dhe vitamina.