Altin Goxhaj, kryetari i Aleancës Konservatore për Shqipërinë, ka njoftuar dorëheqjen e tij nga posti pas rezultatit zhgënjyes të partisë së tij në zgjedhjet parlamentare të 11 majit. Ai ka lëshuar akuza të forta ndaj Partisë Demokratike, duke i akuzuar për vjedhje votash dhe sabotim të kandidatëve të tij.
Në një deklaratë të gjatë publike, Goxhaj pranoi përgjegjësinë për dështimin, duke theksuar se zgjedhjet u zhvilluan në një kontekst të “pengmarrjes nga Shteti-Parti i Rilindjes”. Megjithatë, ai theksoi se objektivi elektoral, prej 10,000 votash vetëm në qarkun e Tiranës, nuk u arrit. Deri tani, partia e tij ka siguruar vetëm 1,734 vota, me pritshmërinë që të arrijë rreth 3,000 vota pas numërimit të mbetur, një shifër shumë larg pritjeve.
“Bazuar në llogaritjet e mia, votat e Aleancës Konservatore mund të arrijnë deri në rreth 3,000, një shifër sërish shumë më e ulët se pritshmëria dhe standardi minimal për të qëndruar në politikë aktive,” deklaroi Goxhaj.
Goxhaj nuk nguroi të akuzonte Partinë Demokratike dhe drejtuesin e fushatës, Belind Këlliçi, për sabotimin e kandidatëve të listës së hapur në Tiranë. Ai pretendon se votat e partisë së tij janë vjedhur, duke ndikuar ndjeshëm në rezultatin përfundimtar.
“Më vodhën votat,” akuzoi Goxhaj, duke theksuar se ky veprim ka ndikuar në performancën e dobët të Aleancës Konservatore.
Dorëheqja e Goxhajt dhe akuzat e tij të rënda ndaj Partisë Demokratike pritet të nxisin debate të mëtejshme rreth integritetit të zgjedhjeve dhe marrëdhënieve brenda opozitës.