Prishtinë, Kosovë – Një alarm për siguri ka detyruar evakuimin e menjëhershëm të të gjithë deputetëve, mediave dhe stafit nga ndërtesa e Kuvendit të Kosovës këtë mëngjes, pak para se të rifillonte seanca konstituive.
Policia e Kosovës ka urdhëruar largimin e menjëhershëm të të gjithë të pranishmëve. Megjithëse nuk ka pasur ende një deklaratë zyrtare nga Policia në lidhje me evakuimin, deputetët e pranishëm konfirmuan se bëhej fjalë për një kërcënim të mundshëm sigurie.
Abelard Tahiri, deputet i Partisë Demokratike të Kosovës (PDK), deklaroi: “Na dhanë udhëzime me dalë, sepse ka një kërcënim me gjasë. Nuk e dimë çka po ndodh dhe na kërkuan me dalë. Policia na tha për çështje të sigurisë.”
Edhe Vlora Çitaku, gjithashtu deputete e PDK-së, konfirmoi se sigurimi u kishte kërkuar të largoheshin nga ndërtesa pa dhënë shpjegime të detajuara. “Siç duket ka pasur ndonjë kërcënim për ndonjë sulm apo diçka të ngjashme. Nuk kemi informatë të saktë, vetëm na thanë të largohemi,” u shpreh ajo.
Aktualisht, forcat e sigurisë po kryejnë kontrolle të detajuara në ndërtesën e Kuvendit. Detaje të mëtejshme priten pasi Policia të lëshojë një deklaratë zyrtare mbi natyrën e kërcënimit dhe rezultatet e kontrolleve.