SHBA – Programi shtetëror amerikan USAID (Agjencia e Shteteve të Bashkuara për Zhvillim Ndërkombëtar) ka pushuar zyrtarisht dhënien e ndihmës së huaj, duke filluar nga 1 korriku. Ky ndryshim thelbësor, që ishte ndër më të debatuarit në SHBA në muajt e parë të këtij viti, do të shohë programet e ndihmës së huaj të administrohen drejtpërdrejt nga Departamenti i Shtetit (DASH).
Sipas një deklarate të shpërndarë nga DASH, programet e ndihmës së huaj, të cilat përputhen me politikat e administratës dhe avancojnë interesat amerikane, do të menaxhohen me “më shumë llogaridhënie, strategji dhe efikasitet”.
Edhe Sekretari i Shtetit i SHBA-së, Marco Rubio, njoftoi zyrtarisht shpërbërjen e USAID-it si një agjenci e pavarur. Sipas Rubios, ky vendim shënon “fundin e një epoke të joefikasitetit të qeverisë të sanksionuar zyrtarisht”.