Tiranë – Laert Haxhiu, i njohur si kreu i “bandës së Lushnjës”, rrezikon të izolohet në regjimin e sigurisë së lartë “41 bis” pasi në qelinë e tij në Burgun e Drenovës u gjet një telefon. Pajisja do t’i nënshtrohet një ekspertimi të thelluar për të zbuluar komunikimet e mundshme që ai mund të ketë kryer nga brenda ambienteve të burgut.
Dyshohet se Haxhiu ka vazhduar aktivitetin kriminal edhe nga qelia, duke komunikuar me elementë të tjerë kriminalë. Zbërthimi i përmbajtjes së telefonit pritet të hedhë dritë mbi këto dyshime dhe të zbulojë rrjetin e tij të komunikimit.
Ky incident vjen në një moment kritik për Haxhiun, pasi çdo provë e re për vazhdimin e aktivitetit kriminal nga burgu mund të çojë në ashpërsimin e masave të sigurisë ndaj tij, përfshirë transferimin në regjimin e izolimit “41 bis”, i cili zbatohet për kriminelët me rrezikshmëri të lartë dhe synon ndërprerjen e kontakteve të tyre me botën e jashtme.